A coalición En Común, integrada por Podemos Galicia e Esquerda Unida, repite cabezas de lista polas catro provincias galegas coa excepción de Ourense, onde entra o exdeputado por En Marea David Bruzos en substitución de Ledicia Piñeiro.

Así, a ferrolá Yolanda Díaz encabezará a lista por Pontevedra, mentres que Antón Gómez-Reino farao pola Coruña, circunscricións polas que En Común obtivo dous deputados nas xerais do pasado mes de abril.

Pola súa banda, Vanessa Somoza repite como número un por Lugo, mentres que en Ourense prodúcese o único cambio nos postos de saída da coalición, da que caeu Equo respecto de abril tras a decisión dos ecoloxistas de decantarse pola alianza con Más País, o proxecto liderado por Íñigo Errejón.

Así as cousas, as listas electorais de En Común sofren poucas varacións respecto dos comicios de abril. A exparlamentaria Ángela Rodríguez ocupa de novo o segundo lugar na lista por Pontevedra, circunscrición na que figura como número un á Cámara Alta a exsenadora por En Marea Vanesa Angustia.