O Partido Popular capitaneado por Alberto Núñez Feijóo é a forza máis votada en 298 concellos galegos, posición que só perde en 15 localidades, xa que o PSdeG imponse en nove municipios e o BNG en seis.

En concreto, mentres o proxecto liderado por Alberto Núñez Feijóo é o máis apoiado na práctica totalidade dos concellos, os socialistas de Gonzalo Caballero son primeira forza na Illa e Fornelos de Montes, ambos os dous na provincia de Pontevedra; en Carballeda de Avia, Entrimo, Calvos de Randín e Parada de Sil, en Ourense; e Pedrafita do Cebreiro, Nogueira de Muñiz e Ribeira de Piquín, na de Lugo.

Neste nove municipios, os populares son a segunda lista en apoios recibidos, mentres que o Bloque Nacionalista Galego sitúase como terceira forza.

Pola súa banda, o BNG é a papeleta pola que máis cidadáns optan en seis municipios: Corcubión, na provincia da Coruña; O Grove e Soutomaior, na de Pontevedra; así como en Verea, Allariz e A Mezquita, na de Ourense.

En todos estes, o PP tamén é a segunda candidatura que máis apoios recibe, de forma que o PSOE queda no terceiro posto.

PORCENTAXE MÁIS AMPLA DE APOIO

O PPdeG volve concentrar as súas maiores porcentaxes de apoio, chegando a superar o 80% dos votos, en varios municipios de Ourense, como é o caso de Avión, Beariz e Quintela de Leirado.

En concreto, en Beariz, os de Alberto Núñez Feijóo fanse cun 86,6% dos votos, mentres que o resto de forzas quedan nun 5,5% (BNG) e un 4,9% (PSdeG). Pola súa banda, en Avión, o PP obtén un 85,8%, mentres que o PSOE só chega ao 5,5% e o Bloque ao 3,6%.

Por último, en Quintela de Leirado, o PP chega a cultivar un 84,8% dos sufraxios emitidos, mentres que o PSOE obtén un 9,8% e o BNG un 3,7%.

ESPAZO COMÚN - RECORTES CERO, SEGUNDA FORZA EN PIÑOR

En Piñor, municipio ourensán da comarca do Carballiño, a coalición Espazo Común-Recortes Cero-Os Verdes-Municipalistas foi a segunda forza máis votada co 21,23% dos votos totais nun concello no que o PP se achegou á barreira dos 60%.

Esta candidatura estaba encabezada na provincia de Ourense por Francisco Fraga, alcalde de Piñor entre 2007 e 2015 polo Partido Socialista, formación que abandonou para, en 2019, unirse a Espazo Común, o proxecto creado polo exsecretario xeral socialista Pachi Vázquez.

CANGAS

En Cangas (Pontevedra), o PP foi a lista máis votada por unha marxe de 13 votos respecto da seguinte forza, o BNG. Neste municipio da comarca do Marrazo o rupturismo obtivera fai catro anos uno dos seus mellores resultados, cando se produciu un empate técnico entre PP e En Marea cos primeiros por diante por apenas 30 votos.

Nesta ocasión, a candidatura herdeira daquel espazo, Galicia En Común, quedou relegada ao cuarto lugar e o seu lugar como segunda forza ocupouna o BNG, que quedou a 13 papeletas dos populares, lista máis votada con 4.354 polos 4.341 dos nacionalistas.