O presidente provincial do PP en Pontevedra, Alfonso Rueda, felicitouse polos resultados do partido nas últimas eleccións e dixo estar "dobremente satisfeito" por revalidar a maioría absoluta e porque a provincia foi "decisiva" para este "resultado histórico".

O PP de Pontevedra celebrou este venres en Moraña a súa Xunta Directiva Provincial, na que estivo o presidente do PPdeG, Alberto Núñez Feijóo e na que se analizaron os resultados do 12 de xullo.

Na súa intervención, Rueda agradeceu o traballo dos alcaldes e portavoces nos 61 concellos da provincia durante unha campaña "atípica", tras a que considera que "se premiou a xestión do Goberno da Xunta durante estes anos" e tamén na crise sanitaria pola COVID-19.

O 12 de xullo, agregou, o PP demostrou que é "un partido unido, estable e con capacidade de xestión" e que a xente "valorou iso" tanto en Galicia como na provincia.

En traballo de rúa nos concellos "tamén foi importante para animar á xente a ir votar" e para que os electores perdesen "o medo" e comprendesen que eran "unhas eleccións totalmente seguras". O resultado logrado, dixo Rueda, foi "magnífico".

Aínda que os populares non gobernan en ningunha do tres cidades "o PP volveu gañar en todas elas", destacou e sinalou que foi tamén a forza máis votada en 57 concellos.