A conselleira do Mar en funcións, Rosa Quintana, visitou este mércores ao alumnado dun dos cursos que o centro de formación A Aixola imparte despois da súa reapertura a comezos deste mes e dentro dunha oferta académica que inclúe oito programas, máis dun centenar de prazas e unhas 2.100 horas lectivas destinadas tanto a profesionais do sector pesqueiro como a persoas que se preparan para entrar nel.

O centro, con sede no porto de Marín e dependente da Consellería do Mar, tiña previsto retomar a actividade formativa o pasado mes de abril, pero tivo que aprazala a consecuencia da alerta sanitaria polo coronavirus. Esta formación céntrase en distintas actividades fundamentais para o desenvolvemento do sector marítimo-pesqueiro que van desde o traballo coas redes, con madeira, con materiais como o poliéster, veas ou a reparación de embarcacións neumáticas e de instalacións eléctricas e mecánicas en buques menores.

A formación é impartida pola Consellería do Mar a través do Centro Tecnolóxico do Mar (Cetmar) e complétase cos módulos formativos de riscos laborais, que están dispoñibles para todos os alumnos, que tamén poderán participar nas accións para a procura de emprego e autoemprego así como nas tutorías de apoio para facer un mellor seguimento do proceso formativo.