O comité clínico de expertos que asesora á Xunta no marco da pandemia pola Covid-19 avaliará na súa reunión desta semana, prevista para este martes, se se manteñen as medidas na liña das actuais ou se expón "desescaladas" en función da situación epidemiolóxica.

Así o explicou o xerente do Sergas, José Flores, a preguntas dos medios nun acto no Hospital Clínico de Santiago, quen puntualizou que "o comité clínico este último mes vai collendo unha liña un pouco diferente ao comezo da pandemia", xa que "a situación dos hospitais non é a mesma", como en ondas anteriores. "Non ter tanto impacto a nivel hospitalario ten que condicionar a repercusión a nivel da sociedade galega", abundou.

Por iso, o xerente do Sergas asegurou que "as medidas van ir na mesma liña". "Imos seguir aplicando os mesmos criterios que nas dúas últimas semanas. Cremos que poderemos empezar a pensar en manter esas medidas ou mesmo desescaladas en función da situación que estamos a ver nos últimos días", sostivo.

Sobre a evolución da situación epidemiolóxica, Flores sinalou que van "dous ou tres días" nos que parece "que a curva se empeza a decrecer". "Queremos ver de forma optimista que empezan a descender os casos activos, o balance entre as altas epidemiolóxicas e casos novos está en negativo, cousa que non ocorría durante case todo o mes de xullo; apareceron todos os días sempre en positivo e con números moi elevados", explicou.

Por iso, asegurou que "se se cumprían as expectativas da incidencia acumulada" o "pico máximo" rexistrarase "na primeira semana de agosto". Así, espera que "poida ser así" porque "se está aplacando". "E queremos ver ese inicio da baixada de casos", concluíu.

De feito, segundo os datos sobre a evolución da pandemia en Galicia actualizados pola Consellería de Sanidade este luns, por primeira vez desde o 20 de xullo baixaron do milleiro os novos contaxios de Covid-19 e os casos activos reducíronse, tras incrementar o domingo despois dun lixeiro descenso o sábado despois de máis dun mes en continuo ascenso.

MOCIDADE CON MÁIS IMPACTO

Preguntado sobre se será a quinta a última onda da Covid, o xerente do Sergas, admitiu que iso se descoñece. "Sempre pensamos que é a última; ponse algún mecanismo máis que a anterior onda para que trate de impactar menos na sociedade", sinalou. Neste caso, incidiu en que "a vacinación parece que ten o seu resultado". Deste xeito, lembrou que este verán esa mocidade que aínda non está inmunizada contra a Covid "é a que máis está impactada no número de casos". "Esperamos a ver que pasa", concluíu.

CAPACIDADE DE VACINACIÓN

O xerente do Sergas, José Flores, tamén insistiu este luns en que as vacinas contra a Covid-19 repartidas polo Ministerio de Sanidade recibidas "limitan a capacidade de vacinación" en Galicia. Sobre o grupo de 20 a 29 anos, o xerente do Sergas indicou que dentro dos dez anos que abarca empezaron, como nos anteriores, "polos máis maiores" e vaise "descendendo". Preguntado sobre cantas vacinas ten previsto recibir Galicia esta semana, o xerente do Sergas apostou por ser "moi cautos con esa información" porque "moitas veces o número que finalmente chega non é o mesmo que din inicialmente, ou non chegan os días que din".

"Non é a primeira vez que temos que reprogramar toda a vacinación dunha semana e creo que, desgraciadamente, non será a última vez", explicou Flores, quen apelou a ser "moi cautos con ese número". "Cando se reciban farase público e repartiranse entre os puntos de vacinación", concluíu.