A Cámara de Comercio, Industria, Servizos e Navegación de Santiago de Compostela acaba de presentar a súa programación formativa para o primeiros semestre do ano con cursos e xornadas sobre informática e novas tecnoloxías, economía e finanzas, recursos humanos, comercio e distribución, busca de emprego, idiomas, comercio internacional e emprendemento para as empresas dos trinta e dous concellos da demarcación cameral.

A entidade programou varias xornadas que tratarán de desenvolver temas demandados actualmente polas empresas, como a figura do community manager e a importancia das redes sociais, técnicas de coaching e habilitades directivas, seminarios prácticos de escaparatismo ou personal shopper para incentivar as vendas.

Os primeiros cursos inciaranse o 22 de febreiro. Impartirase formación ás empresas para crear unha web corporativa de maneira fácil e práctica a través de wordpress. Ofrecerase nesas mesmas datas un curso de xestión sobre as obrigas laborais e fiscais para dotar ás pequenas e medianas empresas das ferramentas necesarias para lograr un control íntegro da empresa desde un punto de vista legal e un control interno que lles permita maximizar o beneficio do seu negocio.

Ademais, a Cámara desenvolverá o Programa Integral de Cualificación y Empleo (PICE), cofinanciado polo Fondo Social Europeo (FSE). Este programa está dirixido a mozos e mozas inscritos no Sistema Nacional de Garantía Juvenil, onde a Cámara se sitúa como punto de inscrición de referencia. Impartirase unha formación troncal sobre tecnoloxías da información e da comunicación, empregabilidade e habilidades sociais e inglés, xunto con outras formacións específicas coa finalidade de axudar á mocidade a incorporarse ao mercado laboral.

A Cámara celebrará tamén dúas edicións do programa de creación e consolidación de empresa, en colaboración coa Fundación Incyde, dúas xornadas relacionadas co comercio exterior sobre oportunidades comerciais en Perú e franquicias.