Na súa primeira convocatoria, Senda Startup apoiará a un máximo de cinco empresas emerxentes, que deberán centrar a súa actividade na área da saúde, o benestar, a asistencia ou o envellecemento activo, e estar en disposición de saír ao mercado nun prazo de seis meses, tras o seu paso polo programa de aceleración.
Así o explicou Alberto Casal, xerente de Senda, no salón de actos da Zona Franca de Vigo, onde tivo lugar a presentación e onde a aceleradora terá a súa sede e o espazo de coworking desde o que traballarán as empresas seleccionadas.
As startups interesadas en formar parte de Senda poderán presentar a súa candidatura ata o vindeiro mércores 31 de maio, data na que finaliza o prazo de inscrición, cumprimentando o formulario habilitado na
www.sendastartup.com, onde tamén atoparán información sobre as bases e requisitos para formar parte da aceleradora.
Mentorización e financiamento personalizado
O programa constará dunha duración de seis meses, no que as startups recibirán formación e asesoramento personalizado, adaptado ao seu grao de maduración e procedencia non hai limitación en canto ao país de orixe dos proxectos-. Así, dispoñerán de apoio técnico, comercial e financeiro de acordo ás súas necesidades e terán acceso á participación en eventos de referencia no sector e á rede de contactos da aceleradora.
Selección de proxectos e calendario
Os proxectos deberán achegar innovacións no ámbito da saúde, a asistencia, o envellecemento activo e o benestar, de tal maneira que contribúan a optimizar os procesos, mellorar a prevención e a seguridade ou impulsar a consecución dunha atención médica máis personalizada a través da tecnoloxía.
O proceso de selección levará a cabo entre os próximos 1 e 30 de xuño, e a aceleración entre o 1 de xullo e o 31 de decembro. A partir desta data, prevese que os proxectos, xa maduros, inicien a fase de despegamento, na que Senda contribuirá identificando a posibles investidores e apoiando a súa consolidación no mercado.