A conselleira de Medio Rural, Ángeles Vázquez, informou de que existen "certos problemas" cos máis de 6.000 puntos de carga do operativo contra o lume en Galicia, porque "parte deles xa non dispoñen de auga".

Na súa visita a Xinzo (Ourense), Ángeles Vázquez indicou que a problemática da seca dificulta o labor do operativo de extinción, xa que supón que hai que ter "un control exahustivo" nos depósitos, porque "non se poden deixar os puntos sen auga".

Nesta liña, remarcou que leva "moito tempo sen chover", con temperaturas altas e humidade baixa. Por iso, pide a colaboración de cidadáns e concellos para a prevención.

Sobre o balance dos lumes, explicou que ningún incendio se atopaba activo na mañá deste venres en Galicia, nunha xornada que se inicia "con tranquilidade".

Respecto diso, indicou que tras unha "onda" de tres días de incendios entre luns e mércores, o xoves mellorou a situación e espera que haxa maior "estabilidade" estes días.

Así, sostivo que "os galegos non poden estar condicionados durante o verán polos incendiarios", polo que espera que as liñas de investigación abertas dean resultado.