Impulsar o talento dos emprendedores novos. Ese é o obxectivo da Feira de Emprego organizada polo Instituto para o desenvolvemento do talento galego na Facultade de Ciencias Económicas e Empresariais da Universidade de Santiago de Compostela para o vindeiro 20 de novembro de 2017.
Este evento contará coa presenza de numerosas empresas, entre as que destacan Garrigues, ABANCA, Finsa, Prosegur, Cruz Vermella, Fundación Ronsel e MGS Seguros. O seu obxectivo é que os participantes coñezan a tendencia do mercado laboral en Galicia e a formación e actitudes que hoxe se esixen por parte das empresas da nosa contorna en diferentes ámbitos de negocio.
Ademais das casetas cos que contarán as empresas, desenvolveranse obradoiros, dinámicas e conferencias levadas a cabo polas propias empresas, e que terán lugar ao longo do día, como poden ser entrevistas e dinámicas por parte de ABANCA e Prosegur ou o asesoramento para mellorar a empregabilidade por parte de Cruz Vermella.
A xornada inaugurarase cunha mesa redonda ás 10.00h na que participarán Javier Dorado, director de INJUVE; Emilia Vázquez, Decana da Facultade de Ciencias Económicas e Empresariais; Roberto Pereira, Presidente do Club Financeiro; e Santiago Calvo, tesoureiro e director do Observatorio do Instituto para o desenvolvemento do talento novo galego. Así mesmo, ás 15.30h terá lugar un debate sobre 'Banca, dereito e talento', na que participarán ABANCA e Garrigues.
O Instituto para o desenvolvemento do talento novo galego é unha asociación dirixida e xestionada por catro galegos que buscan xerar impacto social a través da incubación, desenvolvemento e conexión do talento novo en Galicia. Esta actividade queda englobada dentro das actividades celebradas polo 50 aniversario de estudos en ciencias económicas na Universidade de Santiago de Compostela.
