O presidente da Federación Galega de Municipios e Provincias, Alfredo García, respondeu ao ofrecemento do presidente da Xunta, Alberto Núñez Feijóo, que a Fegamp "sempre" estivo "polo labor" de alcanzar un pacto da auga, pero advertiu de que "ten que haber contrapartidas".

Preguntado por un dos anuncios que realizou Feijóo no transcurso do seu discurso no debate de política xeral que acolle esta semana o Parlamento de Galicia, García lembrou que até agora foi "imposible" lograr ese acordo, a pesar das negociacións coa anterior conselleira.

"Para chegar a acordos, as dúas partes teñen que ceder. Así que veremos a ver se hai a flexibilidade que non houbo antes", destacou o responsable da Fegamp. Núñez Feijóo propuxo un modelo "semellante ao de Sogama", para a xestión de residuos, pero para a auga, é dicir, un "modelo que garanta un único sistema de subministración e de tarifas para toda Galicia".

En canto á redución do recibo do lixo un 10%, Alfredo García sinalou que ese acordo se produciu no seo de Sogama e que desta maneira contrarréstase a subida "tan brutal" de máis do 30% que se acometeu no seu día.