O Hospital Álvaro Cunqueiro (HAC) de Vigo enviou un informe ao xulgado sobre o caso dun bebé que ingresou o pasado luns falecido despois do parto. Segundo publicou 'La Voz de Galicia' na súa edición deste mércores, tratouse dun "parto na casa", que se desenvolveu "sen o apoio de ningún profesional sanitario".

A nai, con iniciais T.M.D. e 33 anos de idade, foi trasladada ao complexo hospitalario xunto ao bebé, segundo confirmou o 061 a Europa Press. O servizo de Urxencias Sanitarias de Galicia informou de que recibiu unha chamada ás 14.00 horas do pasado luns 10 de decembro, na que se requiría asistencia médica nun domicilio.

Ao lugar trasladáronse dúas ambulancias, unha medicalizada e outra asistencial, que levaron á muller e ao menor até o Cunqueiro. O bebé faleceu antes de entrar no centro hospitalario, segundo confirmou o Sergas a Europa Press.

Fontes do Tribunal Superior de Xustiza de Galicia manifestaron que o informe do centro sanitario chegou ao xulgado de garda, o número 5 de Vigo, que ten intención de inhibirse ao xulgado número 4 pola data na que ocorreron os feitos.