Tras o anuncio de que Luís Villares irá ao grupo mixto rachando co grupo parlamentario de En Marea, comezaron as reaccións. Xuntos, a excisión de Podemos Galicia moi crítica coa formación morada, propón unha unidade de acción ao BNG e a En Marea de cara a traballar conxuntamente nas próximas eleccións autonómicas “onde o BNG estea ao fronte por peso específico, mentres se respecte o traballo municipal e municipalista, independente e autónomo de Xuntos e En Marea”.

A coordinadora da formación arremete directamente contra Pablo Iglesias, Carmen Santos e o seu sucesor Antón Gómez Reino, ao que considera “o responsable directo da destrución de Podemos Galicia”. Ademais acúsao de inventarse a Galicia en Común, que cualifica de “marca que quere representar a unidade popular pero acaba sendo unha axencia de colocación de amigos”.

Ademais, a formación presenta “solidariedade e apoio a Luís Villares”. Consideran que o portavoz de En Marea “foi utilizado como un obxecto máis no camiño do engano aos cidadáns”, que levarían Yolanda Díaz e Gómez-Reino. Destaca que En Marea “foi dende o inicio” un partido diferente a Podemos.

Xuntos considera que “o único prioritario” é o municipalismo entendido como a transformación en partidos municipais de todas as agrupacións locais. Ábrense a un acordo con En Marea sempre e cando a formación liderada por Villares teña a mesma perspectiva porque é “a única defensa produtiva e beneficiosa para os cidadáns”.