ELECCIÓNS.- Suárez Canal despidese do Parlamento

Política - 25 Abril 2005

O deputado ourensano, Alfredo Suárez Canal, despediuse hoxe do Parlamento, pedindo aos novos deputados que saian elexidos o 19-X que "loiten" por Galicia. "Estou moi contento de ter traballado estes ultimos 12 anos polo ben de Galiza", sinalou. A partir de agora, Suárez Canal, traballará coma un militante máis. Houbo eloxios da súa actividade por parte do PPdeG e do PSdeG. "É un dos deputados dos que máis teño aprendido pola súa honestidade e traballo", dixo o socialista Pablo López Vidal.

ELECCIÓNS.- Quintana quere contar con Beiras

Política - 25 Abril 2005

Anxo Quintana quere contar con Beiras para a Campaña Electoral. Tras as declaracións do xa ex presidente do Consello Nacional o pasado venres, Quin dixo que se porá en contacto con Beiras para "fixar" a súa participación na campaña como "mellor considere el". "Teremos eses contactos sen ningún xénero de dudas. Beiras non estivo aquí estes días porque estivo en Barcelona pero estes contactos se celebrarán cando se poidan ter e vamos a fixar a súa participación respondendo ao seu interese por participar na campaña do que eu estou moi contento", apuntou aos xornalistas.

ELECCIÓNS.- EU pensa en volver ao Parlamento

Política - 23 Abril 2005

Dende Esquerda Unida-Esquerda Galega (EU-EG) están convencidos de que poden sacar algún escaño nas próximas eleccións galegas. Hai unha semana, na reunión que mantivo o comité federal de EU coa presencia de Gaspar Llamazares, sinalouse que a crise do BNG pode favorecer a esta formación e lembraron que algo semellante xa pasou en Ferrol, onde parte dos votos do ex alcalde Xaime Bello foron para a concelleira Iolanda Díaz. Llamazares comprometeuse a volcarse con EU-EG durante a campaña electoral.

ELECIÓNS.- Beiras descartase para ir nas listas

Política - 22 Abril 2005

O propio Beiras descartouse hoxe para ir nas listas y sinalou que sempre dixo que non ía ser un "deputado vitalicio". Nembargantes, deixou a porta aberta para voltar ao Parlamento noutra lexislatura, quizais na VIII, porque "a vida da moitas voltas" e porque non ten vontade de desaparecer da "biosfera" nos próximos tempos.

ELECCIÓNS.- Beiras "segue crendo" no BNG

Política - 22 Abril 2005

Beiras quixo hoxe aproximarse Quintana. Nunha rolda de prensa no Parlamento, probablemente a súa última intervención na Cámara tras máis de 20 anos como deputado, sinalou que segue "crendo" no BNG. "Hay que votar unha opción alternativa e eu sigo crendo no nacionalismo que é o único que expresa e formula un proxecto para este país. E iso é claro", afirmou ao ser preguntado se traballará polo cambio. Tampouco descartou intervir na campaña: "iso é materia reservada", limitouse a respostar.

ELECCIÓNS.- No PP, problemas na Coruña e en Pontevedra

Política - 22 Abril 2005

No PP tamén hai dificultades para confeccionar as listas. Así, a dirección popular traballará arreo os próximos días para rematar o plantel electoral, sobre todo na Coruña e en Pontevedra. Na primeira, o ex ministro Romay Beccaria está movendo as súas fichas para situar xente de confianza nos primeiros postos, mentres que en Pontevedra o problema radica en situar a algúns dos actuas deputados que poden quedar sen acta.

ELECCIÓNS.- Os temores do BNG

Política - 22 Abril 2005

O principal temor da dirección nacionalista ante o adianto electoral non é a confección das listas, do programa electoral ou a organización da campaña, senon que Beiras volva falar na prensa. Saben que agora o tempo corre á contra e agardan que o ex presidente do Consello Nacional participe na campaña con máis forza que nunca para derrotar a Fraga porque un dos argumentos que éste utilizou para adiantar as eleccións foi, precisamente, a crise que desencadenou Beiras no BNG coa súa demisión.

ELECCIÓNS.- O desembarco de ministros

Política - 22 Abril 2005

O adianto electoral modificou o plantexamento electoral dos socialistas galegos. A cúpula do PSOE pecharase esta fin de semana para confeccionar, definitivamente, o cartel electoral. Tamén Pepe Blanco acudirá a Galicia para coordinar a campaña dos cargos do Goberno. Os socialistas pretenden contrarestar o golpe de Fraga cun desembarco de ministros e do propio ZP. O Goberno central fará todo o que non fixo nun ano en dous meses, mesmo con anuncios grandilocuentes sobre as infraestructuras, o PEIT e o Plan Galicia. Hoxe mesmo visitarán Galicia Jesús Caldera e Elena Espinosa

ELECCIÓNS.- PPdeG e PSdeG comezan a campaña

Política - 22 Abril 2005

PPdeG e PSdeG comezaron hoxe a campaña electoral a través dos medios de comunicañción. Así, os populares esixen nunha publicidade na Voz de Galicia que o Goberno cumpla o Plano Galicia, mentres que os socialistas insertaron unha páxina en todos os xornais galegos cunha foto de Touriño e o slogan "Preparados para gobernar". Estes dous partidos dispoñen de amplios recursos financieiros para o desenvolvemento da campaña e mesmo se desplazarán a Latinoamérica e Europa con prensa incluida. No BNG a caixa está moito máis minguada.

O "escudeiro" de Beiras

Política - 22 Abril 2005

Dende que comezou a crise no BNG o deputado ourensán Chema Ferreiro non se separa de Xosé Manuel Beiras no Parlamento. Ambos os dous son moi amigos dende a súa etapa de viaxe en Esquerda Nacionalista, formación da que foron expulsados logo da X Asamblea Nacional. Hai quen xa lle apoda maliciosamente como o "escudeiro" de Beiras.

ELECCIÓNS.- Ibarra non quere pacto co BNG

Política - 21 Abril 2005

O presidente extremeño, Juan Carlos Rodríguez Ibarra, non quere un pacto PSdeG-BNG na Xunta. Ao ser preguntado nun acto no que participaba en Segovia comentou que "si fuera gallego haría una apuesta clarísima: o bien que gobierne Fraga o bien que gobierne el PSOE, pero como anden con tonterías y metan por medio al Bloque, se pueden tirar años discutiendo".

ELECCIÓNS.- Diferencias no PSdeG vigués

Política - 21 Abril 2005

Por outra banda, no PSdeG vigués difiren sobre os obxectivos do cambio na Xunta. Así, mentres Pérez Mariño asegura que Touriño cambiará o PGOM se é presidente, tanto Miguel Barros como Manel Gallego aseguran que as eleccións non poden ser consideradas como un referéndum deste plan.

As claves do adianto

Política - 21 Abril 2005

Finalmente xa hai data oficial, 19 de xuño. O presidente galego, Manuel Fraga, decidiu adiantar os comicios moi ó seu pesar xa que tiña anunciado que ían ser outubro. Pero puido máis o aparello do partido que a súa palabra. As presións de grandes sectores do PP, especialmente de Madrid, obrigaronlle a reconsiderar a súa decisión. Entre os principais argumentos utilizados polos defensores desta teoría están a crise do BNG, os sondeos que lle dan maioría, coller a contra pé ós estudiantes (que estarán en exames e, tradicionalmente, son votantes de esquerda), evitar a mala prensa dos incendios do vran e, sobre todo, aproveitar a baza do incumplimento do Plan Galicia, que comezou a calar na xente.

Eleccións en xuño

Política - 21 Abril 2005

Fraga convocou esta mañán as eleccións autonómicas para xuño, catro meses antes do previsto. Todos os seus conselleiros e dirixentes do PP galego xa están preparados. A reunión que mantivo onte con Baltar foi, precisamente, para pechar a lista electoral en Ourense. Os populares galegos parten con ventaxa porque xa teñen, prácticamente, pechadas as candidaturas, aínda que hai certos problemas de encaixe en Pontevedra e A Coruña.

Novo colectivo republicano

Política - 21 Abril 2005

Onte presentouse oficialmente a Plataforma de cidadáns pola República en Galicia coa participación do catedrático e republicano, Xesús Alonso Montero, e o vicepresidente desta plataforma, Raúl Marco. Este colectivo viña traballando dende o pasado ano para organizarse e conta con presencia en Vilagarcía, Pontevedra, Santiago e A Coruña. Consulta aquí a información que dimos en novembro.

As presións de Madrid

Política - 20 Abril 2005

O presidente galego está sometido a unha gran presión por parte do PP de Madrid para adiantar as eleccións a xuño. Dende Xénova xurdiron os rumores a pasada semana, e dende Xénova se encargaron de movilizar á tropa galega para presionar ou convencer a Fraga. Nesta táctica interviu ata o propio Rajoy. O anuncio da Ser de hoxe ía neste sentido. Xa son moitos os conselleiros -da boina e do birrete- que apostan por esta opción e non sería de estrañar que o presidente galego anunciara o adianto mañán. Dende a oposición están convencidos tamén que os comicios serán en xuño. Pero a decisión é, exclusivamente, de Fraga.

A marxinación de Sineiro

Política - 20 Abril 2005

Un dos históricos deputado do PSOE que non conta nas quinielas electorais da dirección socialista é o ex conselleiro de Agricultura durante o tripartito, Francisco Sineiro. Sineiro, un grande amigo do actual embaixador para as relacións coas comunidades galegas no exteriror, Miguel Cortizo, leva distanciado de Touriño e do seu equipo parlamentario dende hai meses.

"Chulerías e vaciles"

Política - 19 Abril 2005

Hoxe viviuse unha escena moi tensa na comisión de Educación e Cultura do Parlamento galego. A secretaría xeral para o deporte da Xunta contestaba a unha pregunta do deputado José Manuel Lage Tuñas sobre as partidas orzamentarias adicadas a fomentar o deporte entre os universitarios dende 2002.

¿Adianto electoral?

Política - 19 Abril 2005

Hai un sector do PP galego, apoiado por Madrid, que presiona a Fraga para que adiante as eleccións a xuño. Este círculo está convencido de que se os comicios se celebran dentro de tres meses, o PP obterá maioría absoluta.

Os 'Non Adscritos' definen o seu futuro

Política - 18 Abril 2005

Os 'Non Adscritos' reuniranse nos vindeiros días para tentar "redifinir" o futuro desta corrente que está divida entre os que defenden a Beiras e os que apoian a Quintana. Por un lado, Quico Chivite e Emilio Ínsua que contan co apoio do Salnés, Ferrol e parte da Coruña. No outro lado Mera con Santiago, parte da Coruña e o Ribeiro. O resto fluctúa. Hoxe mesmo aparece unha entrevista de Roberto Mera en El progreso.

Esta sección conta coa financiación da Deputación de Lugo, do Fondo Europeo de Desenvolvemento Rexional e do Ministerio de Industria, Enerxía e Turismo.