O portavoz institucional do Grupo Común da Esquerda, Manuel Lago, adiantou que na Xunta de Portavoces do martes se oporán a fixar na última semana de setembro o Debate do Estado da Autonomía no Parlamento.

Así, acusa o presidente do Goberno galego, Alberto Núñez Feijóo, de "burlarse" da Cámara e "utilizala en beneficio do PP" por solicitar que esta sesión anual se celebre antes de que finalice o mes. O ano pasado, tivo lugar os días 9, 10 e 11 de outubro.

"Parécenos unha irresponsabilidade inadmisible", afirmou Lago este sábado, á vez que acusou o titular da Xunta de "usurpar o papel das institucións" para "buscar atallos que lle permitan actuar na política española".

"Este debate é o principal nun ciclo parlamentario. Aí hai que debater dos problemas do país e buscar acordos entre todas as forzas políticas para darlles solución, e o que fai o presidente anticipando esta cita é utilizar o Parlamento para asegurar a súa participación no debate electoral do conxunto do Estado", esgrime o portavoz institucional do Grupo Común da Esquerda.

Finalmente, Manuel Lago considera que Feijóo "non ten interese en falar do país", senón que o debate é "unha trampa para non falar do seu balance de goberno, para que se lle esconda á cidadanía galega un balance serio e rigoroso de cal é a situación de Galicia despois de dez anos gobernando o PP, e distraer a atención co debate estatal".