A plataforma de vítimas do Alvia 04155 sinistrado en Santiago en xullo de 2013 cualificou de "ofensa" a decisión do PP de situar no número dous da candidatura ao Congreso por Madrid á exministra de Fomento Ana Pastor, a quen acusan de ser "a persoa que máis traballou para tratar de ocultar as verdadeiras causas" da traxedia que deixou 80 mortos e máis dun cento de feridos.

As vítimas aseguran que "en calquera democracia que se prece", unha persoa co "currículo" da expresidenta do Congreso "non só non se presentaría ás eleccións, senón que o que faría é irse á súa casa pedindo antes perdón por toda a dor que xerou".

Nesta liña, afirman que Pastor "prometeu, tanto en privado como en sede parlamentaria, unha investigación técnica independente e plena colaboración coa xustiza". "Mentiu ás vítimas e á cidadanía", engaden.

Lembran que "diferentes autos" xudiciais apuntan á "falta de colaboración" coa xustiza por parte do departamento que entón dirixía a política pontevedresa, a quen acusan de "premiar" a "algúns dos responsables".

Así mesmo, apuntan que durante a súa etapa como ministra "presionou a UE tratando de ocultar un informe clave sobre a traxedia", que finalmente foi publicado e que arroxaba conclusións "demoledoras" contra a "verdade oficial" que "querían impor que se fixo unha investigación independente, que o maquinista era o único responsable e que o accidente non era de alta velocidade".

"Para Ana Pastor e o seu equipo os negocios eran máis importantes que buscar a verdade e depurar responsabilidades", engade a plataforma, que tamén subliña que durante a época de Pastor á fronte de Fomento se produciu a desconexión do sistema de seguridade ERTMS.

A ALCALDESA DE MARÍN OCUPA O SEU POSTO POR PONTEVEDRA

A alcaldesa de Marín, María Ramallo, substitúe a Ana Pastor como cabeza de lista do Partido Popular en Pontevedra para as eleccións xerais do 10 de novembro. Así o anunciou este luns o presidente provincial do PP, Alfonso Rueda.

Segundo o vicepresidente da Xunta, o que para "outro partido" sería "un contratempo e un serio problema", no caso do PP é "unha oportunidade" para situar unha persoa "á altura de quen deixaba o posto" que, coa súa designación por Madrid, recibe "un recoñecemento á súa traxectoria, prestixio e valoración", abundou.

Rueda cre que a incorporación de Pastor á lista de Madrid fai que esta sexa "moitísimo máis potente" e agora espera que sexa "aínda máis atractiva" para o electorado de cara a "mellorar os resultados". "Somos optimistas e humildes; aquí non hai nin nada gañado nin nada perdido", engadiu.