Por E.P. | SANTIAGO DE COMPOSTELA | 11/03/2020
O BNG puxo "en marcha" a súa maquinaria municipal para o 5 de abril cunha reunión da portavoz nacional e candidata á Xunta, Ana Pontón, e representantes municipais, incluídos os alcaldes nacionalistas. Tras ela, a líder do Bloque tamén pediu un novo modelo de financiamento local, vinculado a un concerto económico para Galicia como o do País Vasco.
Ana Pontón, que exhibiu o seu "orgullo" por poder comparecer "rodeada" de alcaldes e alcaldesas e representantes municipais, tomou o "exemplo dos concellos transformadores e innovadores" para pór en valor o potencial do BNG e a "fortaleza" que esta formación presenta ás eleccións autonómicas.
A líder nacionalista subliñou que se presentan "solucións propias pensadas desde Galicia, pero mirando o que pasa no mundo. "Somos capaces de cambios transformadores", incidiu Pontón, quen dixo que "é clave unha Galicia gobernada desde Galicia".
En nome dos representantes locais, a alcaldesa de Tomiño, Sandra González, manifestou que os concellos nacionalistas están "esperanzados" nun "cambio" o próximo 5 de abril, para que haxa un goberno que "trate igual" a todos os concellos do país.
En todo caso, indicou que a reunión deste mércores serviu para pór en común a "preocupación" dos representantes municipais pola crise do coronavirus e sinalou que se pon a disposición da Xunta para "seguir as indicacións e colaborar no que sexa necesario" de forma "absolutamente leal".
¿Gustouche esta nova?
Colabora para que sexan moitas mais enviando un SMS coa palabra GC ao 25511
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións). Agradecemos a túa colaboración.
Reunión da portavoz nacional e candidata á Xunta, Ana Pontón, con alcaldes e representantes municipais do BNG / Europa Press