O presidente da Xunta volveu presumir da situación dos hospitais galego na crise do coronavirus. Logo da suspensión de todas as actividades cirúrxicas, de insistir na asistencia telefónica e non presencial e do medo da xente de acudir aos hospitais por temor a contaxios, Feijóo destacou que a situación das camas nos hospitais e das camas UCI en Galicia é un das mellores dos últimos anos cando a crise xa está remitindo.

"Estamos sen dúbida preocupados, pero nunha situación absolutamente distinta, co 59 por cento das camas en UCI en Galicia baleiras", remarcou o mandatario autonómico, que engadiu que hai 3.570 camas de hospitalización "baleiras": "nunca tivemos tanta capacidade asistencial na nosa historia, nin cando eramos Insalud nin desde o 1991", sendo Sergas.

Feijóo tamén apelou a que os estudos epidemiolóxicos, tanto o do Goberno central como o realizado especificamente pola Xunta, revelan que o "virus apenas circulou pola comunidade autónoma". Ambos "acreditan que o 98 por cento dos galegos non tivo contacto co virus", indicou o mandatario autonómico, quen agregou que, en consecuencia, estamos "ante unha situación moi limpa, desde o punto de vista de circulación interna", aínda que ese dato "ten aspectos positivos e preocupantes", recoñeceu.

Na súa análise da situación actual, o presidente da Xunta tamén lembrou a evolución da pandemia e contrastouna de tal forma que manifestou que actualmente estamos nunha "clara fase de control". A ocupación de pacientes con covid en unidades de coidados intensivos e en hospitais baixou un 90 por cento: no pico chegou a haber 178 UCI e 946 hospitalizados, mentres que actualmente hai 17 e 93, respectivamente.

Con todo, a actividade nos hospitais galegos seguen sen normalizarse. Moitas operacións cirúrxicas seguen aprazadas, así como atencións básicas que a Xunta insiste en facer por teléfono.