O grupo municipal do BNG na Coruña pide ao Goberno local que reactive o voluntariado municipal que se puxo en marcha durante o confinamento para axudar a persoas afectadas pola COVID-19 "que carezan dunha suficiente rede familiar ou de amizades de apoio".

A través dun rogo escrito rexistrado esta mañá, a concelleira Avia Veira explica, nun comunicado de prensa, que o "repunte" de casos de coronavirus na cidade necesita dunha rede de axuda para as persoas que gardan corentenas nos seus domicilios. "Non dispoñen en ocasións de axuda para cousas tan básicas como ir facer a compra ou baixar o lixo", argumenta.

A edil apunta á "dificultade inmensa" que supón para moitos cidadáns o peche das escolas infantís e os centros de día para poder "soportar o día a día" e tamén sinala que a situación é "especialmente grave" para persoas maiores ou con mobilidade reducida que viven soas.