O comité de expertos que asesora á Xunta desde o inicio da pandemia sentará na tarde deste martes cunha "tendencia positiva" no que respecta ao descenso de contaxios da covid-19 e, aínda que as hospitalizacións aumentaron, o incremento é moi inferior a situacións anteriores e "contido" na UCI, que atenden aos enfermos máis graves. Neste escenario, analizarase o descenso das restricións vixentes e o protocolo para as festas de Entroido.

Prudente sobre as restricións que se van puír mostrouse o doutor Pedro Rascado, especialista en Medicina Intensiva do Complexo Hospitalario Universitario de Santiago (CHUS) e membro do comité clínico, quen advertiu que, aínda que se materialice dita relaxación, avanzada polo propio presidente Alberto Núñez Feijóo, a "principal mensaxe" será que hai que manter "prudencia, vacinación e máscara".

Rascado considera que aínda é "pronto" para "afirmar con rotundidade" que se superou o pico da pandemia. Iso si, considera que, a pesar de que resulta "máis rechamante" para titulares este tipo de afirmacións, é moi relevante poder constatar que se está "estabilizando unha tendencia positiva" no descenso dos contaxios.

Que aumente a hospitalización entra "dentro do normal" nunha conxuntura deste tipo, xa que a alza nos ingresos adoita chegar "con algo de atraso" con respecto á diagnose dos casos, pero o experto pon o foco na situación da UCI, "estable" desde hai días e "moito mellor que hai un ano".

Iso si, rexeita minimizar os casos que hai nas unidades de críticos porque, subliña, o óptimo sería que non houbese "nin un só caso" e insiste en que a clave de que se reducise a gravidade non reside tanto na tipoloxía das variantes como na vacinación. "Diríalle a calquera que estea aínda sen vacinar que vaia agora mesmo", apelou, á vez que sinala a máscara como elemento clave de protección.

De feito, á espera de ver como se enfoca este asunto en Galicia, evitou entrar no debate aberto acerca de se é conveniente reducir as corentenas por baixo dos sete días, como piden xa algunhas comunidades, pero si se mostrou convencido de que pode ser "máis seguro" saír con máscara "aos cinco días" que sen ela "aos sete".

ADEUS AO TOQUE DE QUEDA?

Aínda que "o virus non desapareceu e segue aí" e Rascado cre que falar de forma precipitada da "gripalización" da pandemia pode xerar equívocos non desexables, o comité clínico terá sobre a mesa este martes un descenso das restricións. O propio presidente galego, quen insiste en que as medidas en vigor en Galicia son "mínimas", apuntou esta fin de semana que espera que se poidan relaxar de manterse unha tendencia positiva á baixada de casos.

En concreto, desde a entrada en vigor das últimas medidas antes do fin de ano pasado, bares e restaurantes deben pechar a medianoite agás venres e sábados, que o fan á 1,00 da mañá; mentres que pubs e discotecas teñen de límite as 3,00 horas.

Xunto a isto, segue vixente un toque de queda de fin de semana, xa que as reunións de non conviventes seguen prohibidas de 3,00 a 6,00 da madrugada os xoves, os venres e os sábados.

O toque de queda e as medidas na hostalaría estarán sobre a mesa do comité, segundo ratificou Rascado. En canto ao certificado covid, que se esixe nestes locais, o experto comparte co presidente galego que é unha ferramenta "útil" e que non ocasiona molestias ao usuario.

PROTOCOLO PARA AS FESTAS DE ENTROIDO

Neste contexto, co foco no uso dos espazos públicos e o límite de persoas nas comidas de ámbito privado, os expertos sanitarios tamén analizarán o borrador do protocolo que preparou o departamento sanitario galego para as festas de Entroido.

Feijóo xa avanzou que será diferente ao do Nadal, "máis laxo" e permitindo "unha maior interacción", sobre todo nos espazos exteriores.

Máis cauteloso, en relación á limitación de persoas nas comidas tradicionais con motivo do Entroido, o titular de Sanidade, Julio García Comesaña, lembrou a semana pasada que na actualidade o número que se recomenda sitúase en 10 e agora someterase a análise se se mantén ou reduce.

Neste sentido, resaltou que se trata dunha medida para "tentar reducir a concentración de persoas nunha contorna tan arriscada como é o da comida", onde se quita a máscara, co fin de "tratar de reducir o impacto". "Non falamos de eliminalas, pero si reducir o número para diminuír a probabilidade de contaxio nestes eventos", dixo.

FEIJÓO

Pola súa banda, o presidente da Xunta, Alberto Núñez Feijóo, ve "un interrogante procedente" o debate acerca de se se debe reducir a corentena tras infectarse de covid-19. De feito, afirmou que el sería "partidario" de facelo "se se pode", pero remarcou que a decisión debe ser "clínica" e que "hai que ter moito coidado con iso".

Así o trasladou nunha entrevista en LaSexta na que volveu defender a utilidade do pasaporte covid, que considera "unha garantía" para usuarios e traballadores dos establecementos, por exemplo.