Os hospitalizados con Covid-19 en Galicia continúan en descenso, ata os 241, o que supón 16 menos que os notificados este martes pola Consellería de Sanidade. Ademais, non se rexistran cambios en UCI, onde continúan ingresadas 16 persoas.

En canto aos casos activos, seguen tamén en liña descendente e sitúanse este mércores nos 2.201, 102 menos que os rexistrados o martes. Por contra, ascenden lixeiramente os novos contaxios, ao notificarse 173, 28 máis que nas últimas 24 horas. Así o reflicte o último parte da Consellería, con datos actualizados ata as 18,00 horas do martes 9 de agosto.

Por áreas sanitarias, na Coruña e Cee baixan a 61 os hospitalizados en planta (-5) e a tres en críticos (-1); en Ferrol son 10 os pacientes en unidades convencionais (-3) e un en coidados intensivos (+1); en Pontevedra hai 32 ingresados en planta (-2) e un en UCI (sen cambios); e en Santiago son 31 os hospitalizados en unidades convencionais (-6) e tres en críticos (sen cambios).

Ademais destes descensos, nas áreas de Vigo, Lugo e Ourense non se rexistran cambios. Así, na área viguesa continúan con 21 pacientes en unidades convencionais e tres en UCI; na lucense con 32 en planta e dúas en críticos; e na ourensá con 38 en convencionais e tres en UCI.

CASOS ACTIVOS E CONTAXIOS

Os casos activos, pola súa banda, continúan en descenso e a Consellería de Sanidade notificou este luns 2.201, 102 menos que os rexistrados o martes. Por áreas, descenden de forma xeneralizada. Na Coruña, 499 (-8); en Vigo, 285 (-20); en Santiago, 338 (-21); en Pontevedra, 224 (-34); en Ourense, 361 (-11); en Lugo, 281 (-7); e en Ferrol, 204 (-1).

Sobre os novos contaxios, rexistraron un pequeno aumento e nas últimas horas sumáronse 173 -- 28 máis que o martes--. Deles, 49 notificáronse na área da Coruña, 32 en Vigo, 24 en Santiago, tres en Pontevedra, 25 en Ourense, 28 en Lugo e 11 en Ferrol.

O total de contaxiados en Galicia desde que comezou a pandemia ascende a 671.924, dos que 139.003 rexistráronse na Coruña, 148.941 en Vigo, 107.409 en Santiago, 76.205 en Pontevedra, 82.687 en Ourense, 74.965 en Lugo e 41.730 en Ferrol.

FALECIDOS E CURADOS

Doutra banda, o cómputo de falecidos desde o inicio da pandemia ascende a 3.855. Este mércores, Sanidade notificou dous falecementos de persoas con patoloxías previas, rexistrados o oito de agosto. En concreto, trátase dun home de 75 anos na área sanitaria da Coruña; e outro de 83 anos na de Santiago.

As persoas que superaron a Covid desde que se iniciou a pandemia son 665.975, 273 máis respecto dos datos notificados este luns.