A portavoz nacional do BNG, Ana Pontón, fixou como "liña vermella" nos pactos locais, tras os resultados das eleccións municipais, "non favorecer" gobernos do PP, excepto onde esta formación obtivese maioría absoluta, e buscar, para iso, "gobernos alternativos".

A preguntas dos xornalistas, expuxo que a partir de aí son unha organización que "dá liberdade ás súas asembleas locais e grupos municipais para encarar o proceso de negociación". "Imos traballar en cada un dos concellos, pensando no ben da maioría social para construír políticas útiles", recalcou Pontón, quen insistiu en que "entrar ou non nos gobernos municipais son decisións que tomarán as asembleas locais", pero co obxectivo de favorecer "gobernos alternativos" ao PP.

"VOZ" DE GALICIA NAS XERAIS

Por outra banda, sobre as eleccións xerais, dixo que son unha "oportunidade" para que Galicia "gañe peso político" e teña "capacidade real" en decisións que afecten na comunidade.

"Hai quen quere que estas eleccións sexa un debate a dous e isto non vai do bloque de Sánchez e Feijóo, isto vai do bloque de Galicia, o que nos xogamos é ter capacidade de decisión", sentenciou. "Somos a garantía de que Galicia teña peso", manifestou Pontón, quen insistiu no obxectivo de ter "máis voz en Madrid".