O presidente da Xunta, Alfonso Rueda, ratificou este xoves, tras a reunión semanal do seu Executivo, dez substitucións no segundo nivel do Goberno tras a remodelación da pasada semana. Entre os novos nomeamentos está o da exdeputada vilalbesa Sandra Vázquez, quen foi candidata na localidade lucense o pasado 28M sen lograr a Alcaldía e será secretaria Xeral de Igualdade.

Roda tamén anunciou que Pilar Arias será a nova xeral técnica da Consellería de Infraestruturas; mentres que o enxeñeiro industrial Nicolás Vázquez porase á fronte da Secretaría Xeral de Industria; e José Ramón Pardo acompañará á que era a súa xefa en Emprego, María Jesús Lorenzana, como secretario xeral técnico de Economía.

Rueda avanzou que Covadonga Toca será a nova directora xeral do Igape, e Begoña Abeijón, que dirixía o gabinete da conselleira de Política Social, Fabiola García, será a nova directora xeral de Atención á Discapacidade, e Natalia Lobato asumirá a secretararía xeral técnica de Sanidade tras o paso de Alberto Fontes á Secretaría Xeral de Emprego.

Sandra Vázquez é a nova secretaria xeral de Igualdade, mentres que o enxeñeiro industrial Pablo Fernández foi nomeado secretario xeral de Apoio ao emprego, Traballo autónomo e Economía social; e Joaquín Macho, ata agora secretario xeral técnico de Infraestruturas pasa a ocupar o mesmo posto no medio Rural.

"NON HAI PROBLEMAS"

O presidente da Xunta xustificou estes cambios como "modificacións normais" cando hai reestructuracións nos gobernos. Entre os cesados están todos os altos cargos da consellería de Industria e Economía con Francisco Conde, entre eles, Pablo Casal, Paula Uría e Fernando Guldrís.

"Cada un que chega quere conformar o seu equipo e os que están saben que poden cesar porque son cargos de libre designación. Non houbo problemas e todos o entenderon. Nunca houbo problemas xamais cando houbo cambios nos gobernos", sinalou na rolda de prensa posterior ao Consello da Xunta.