O expresidente da Deputación ourensá e líder provincial do PP, Manuel Baltar, destacou este luns os "magníficos" resultados conseguidos polos populares na súa provincia e prometeu facer "todo por Ourense e por Galicia" no "reto importante" que se lle abrirá como senador por designación autonómica.

En senllos audios distribuídos polo PP tras a Xunta Directiva Provincial do PP da tarde deste luns, Baltar fala de "vitoria inapelable" dos populares, tras conseguir ser "a forza máis votada en 88 dos 92 concellos" da provincia, "a segunda mellor de España", segundo os seus datos.

"Excelente comportamento do partido, levantando esa vitoria electoral dun ourensán a nivel nacional que ten agora ante si unha oportunidade histórica para presidir o goberno da nación", proclama sobre Alberto Núñez Feijóo.

Despois de que o PP postulase a tarde deste luns o seu nome como senador por designación autonómica, Baltar agradeceu tanto ao partido como ao seu presidente, Alfonso Rueda, que "pensasen" nel para unha das vacantes nesa cámara.

Tras lembrar que foi vicepresidente primeiro do Parlamento galego, subliñou que o Senado é a cámara de representación territorial. "Para alguén como eu, un profesional da administración pública e cun exercicio durante máis de 11 anos como presidente dun goberno provincial como o de Ourense, creo que podo achegar moito, podo aprender moito tamén", afirmou.