Os actos políticos do 25 de xullo estarán marcados polos resultados das eleccións xerais que se celebraron xusto 48 horas antes; e protagonizados pola manifestación do BNG, que mantivo o seu escano no Congreso pero quedou lonxe das súas expectativas de ter un grupo propio --aínda que sobe en votos--; e a ofrenda do PSdeG a Castelao.

Con este transfondo, a líder do BNG, Ana Pontón, manifestou que espera ver este 25 de xullo nas rúas "a ilusión" dunha "gran organización que ten un aval dun traballo importante que fai na sociedade e nas institucións" e que confirma, apuntou, que o Bloque "está no mellor momento da súa historia".

"Estamos dispostos a todo e temos un gran reto político por diante, como é darlle a Galicia un goberno á altura deste país, que teña por primeira vez á fronte a unha presidenta do BNG coas mans libres para defender os intereses deste país e devolver a esperanza á xente que o necesita", reivindicou.

Pola súa banda, como é habitual, os socialistas tamén celebrarán o Día de Galicia cun acto con militantes e simpatizantes en Rianxo, coa súa tradicional ofrenda floral xunto ao busto de Castelao na que participarán o secretario xeral do PSdeG, Valentín González Formoso, que estará acompañado doutros dirixentes e cargos socialistas.

MANIFESTO DO PP

Os populares, pola súa banda, non prevén ningún acto específico de partido, aínda que lanzaron un manifesto con motivo do Día de Galicia no que reivindican unha comunidade galega "centrada, tolerante e dotada de amplos dotes de 'sentidiño" que "fan albiscar un futuro moi esperanzador".

Así mesmo, o seu xefe de filas e presidente galego, Alfonso Rueda, terá a súa axenda habitual nesta xornada e participará na Ofrenda ao Apóstolo, na que exerce de delegado rexio por primeira vez. Tamén participará, xa pola tarde, na misa e ofrenda floral a Rosalía de Castro na Igrexa de San Domingos de Bonaval.