Miles de turistas e peregrinos encheron as rúas de Santiago de Compostela polas festas do Apóstolo. Os visitantes ocuparon ao completo as terrazas dos bares e case non había sitio para comer na zona vella da cidade.

De tal forma, este martes chegaron, segundo estatísticas da Oficina de Acollida ao Peregrino, máis de 1.300 camiñantes, os cales sumados aos do luns e o fin de semana superan os 4.000. É dicir que, os peregrinos que elixiron vir nestas festas, representan máis dun 10% do total do mes.

Aínda que os peregrinos continuarán chegando todo o verán a Santiago, onde se selan máis de 2.000 'compostelas' por día, para estas datas vese incrementado o número de visitantes porque varios programaron a súa chegada á cidade para que coincida co día grande da cidade, 25 de xullo.

Segundo a Oficina de Acollida ao Peregrino, pódese evidenciar que aínda predomina o turismo español na cidade, con Andalucía á cabeza entre as comunidades autónomas con máis peregrinos, con 5.204 visitantes no que vai do mes, seguida por Madrid e a Comunidade Valenciana.

Entre os turistas internacionais que elixen a capital galega para pasar as súas vacacións, os estadounidenses, alemáns, italianos e portugueses son as nacionalidades que superan o milleiro de visitantes no que vai de mes. Todos os consultados destes orixines coincidiron que é o sitio "ideal" para "gozar da gastronomía".

Outro dos motivos que os turistas e peregrinos mencionaron para elixir Santiago é que as temperaturas son mais agradables, cunha media que rolda os 25ºC, e son un aliciente para aqueles que escapan da calor do resto da península nesta tempada estival.

Por outra banda, a cidade tamén se viu "blindada" durante estes días, con máis de 400 axentes, para garantir a seguridade na cidade e as súas inmediacións. En tal sentido, avistáronse helicópteros sobrevoando as zonas máis concorridas e un despregamento policial pouco frecuente noutras épocas do ano.