O que foi secretario xeral do PSdeG e actual deputado autonómico, Gonzalo Caballero, considerou necesario que o partido en Galicia busque unha solución "de fondo" que fortaleza a formación e fixar a súa posición política "máis aló do debate de primarias" á Presidencia de Xunta tras os resultados do 23J.

Gonzalo Caballero mostrouse "moi satisfeito polo resultado do PSOE" en España ao superar "os malos agoiros e frear á ultradereita e apunta, ademais, que o líder do PSOE, Pedro Sánchez, ten a "lexitimidade" para tentar formar "un bo goberno para España".

Con todo, en declaracións a Europa Press, avisa de que Galicia é "a única comunidade autónoma na que o Partido Socialista baixa en porcentaxe de votos". "Subimos en todas menos en Galicia", sinala para mostrar a súa "preocupación" polo feito de que "mentres en España o PSOE "sobe 3,5 puntos, en Galicia baixa 1,4".

Ademais, nun contexto no que algúns socialistas apuntan ao exdelegado do Goberno en Galicia José Ramón Gómez Besteiro como posible candidato ás primarias á Presidencia da Xunta, Gonzalo Caballero ve "especialmente graves" os resultados na provincia de Lugo, onde a candidatura ao Congreso estaba encabezada polo político lucense.

Sobre esta cuestión, sinala que, en Lugo, "o Partido Popular supera o 50% dos votos e obtén o mellor resultado que ten a dereita en España". "Non podemos no PSdeG pornos unha venda nos ollos, porque levamos dúas fortes caídas consecutivas nas municipais e nas xerais e temos que reorientar o rumbo para evitar empeorar os resultados das autonómicas", sostén.

En porcentaxe de voto, o Partido Socialista obtivo en Galicia un 29,84%, o que supón 1,4 menos que en 2019 --31,24%--, pero subiu en votos, ao pasar dos 465.026 das últimas xerais a 479.335 apoios.