A sala do Contencioso do Tribunal Supremo desestimou o recurso interposto pola concesionaria da autoestrada AP-53 (Santiago-Ourense), rexeitando que o Goberno deba pagarlle unha indemnización pola caída de ingresos durante o confinamento e as restricións da covid-19.

A pretensión formulada pola Autoestrada Central Galega Concesionaria Española S.A., (ACEGA) xa fora denegada polo Consello de Ministros no seu día, unha decisión que a entidade recorreu aos tribunais que, agora, rexeitaron tamén a súa pretensión. En concreto, reclamaba que o Goberno a indemnizase pola perda de ingresos sufrida polo tramo Santiago-Alto de Santo Domingo desta autoestrada entre o 13 de marzo e o 15 de xullo de 2020, coincidindo co confinamento e as restricións de mobilidade da covid-19.

A entidade explicaba que, entre estas dúas datas, "producíronse fortes restricións á libre circulación de persoas e vehículos", ademais de estar "prohibida a mobilidade interprovincial", e que "se fomentou o traballo a distancia", co que "a sociedade sufriu unha forte perda de ingresos que alteraron a economía da concesión". O artigo 34.4 do RD-L 8/2020, apuntaba ACEGA, "recoñece aos titulares de contratos de concesión unha compensación pola perda de ingresos e polo incremento de custos causado pola situación de feito creada pola covid-19".

MARXE POSITIVA

Fronte a isto, o avogado do Estado apuntaba que durante o período alegado pola empresa, a sociedade concesionaria "cubriu os seus custos e, ademais, obtivo beneficios, dado que a súa marxe bruta de explotación foi positivo", á vez que advertía na intención da demanda tratar de "garantir o beneficio íntegro esperado pola concesionaria, coma se para ela non existise a covid-19".

Así mesmo, nunha tese que avala a sentenza, nega que se producise unha vulneración do principio de igualdade, lembrando que "o que podería ser discriminatorio é que, como consecuencia da covid-19, as concesionarias de autoestradas se aseguren integramente o beneficio esperado (coma se, para eles, non existise a covid-19 nin a lexislación especial que foi necesario aprobar) mentres que os demais contratistas públicos soportan, en parte, as consecuencias da covid-19 nos termos regulados pola devandita lexislación especial".