A Sociedade Anónima de Xestión do Plan Xacobeo e a Xunta de Galicia presentaron o novo número da revista de investigación do Camiño de Santiago e as peregrinacións, 'Ad Limina', que suma nove traballos de investigación ao redor da relación de Cataluña e o Camiño. O evento levouse a cabo no Centro Internacional de Acollida ao Peregrino este luns e a revista, na súa 14º edición, foi coordinada polo profesor Carles Sánchez Márquez, da Universidade Autónoma de Barcelona e Museo de Terrasa.

"Trátase da publicación máis prestixiosa do mundo en materia xacobea, publicada en galego, castelán, inglés, francés, italiano ou portugués, e de carácter dixital, aberta e gratuíta", destacou o director de Turismo de Galicia, Xosé Merelles. Na mesma liña, o director resaltou a publicación como "unha referencia científica ineludible para todo o que teña que ver co Camiño" e remarcou "a alta calidade dos artigos que se desenvolven na revista".

'AD LIMINA'

Esta revista de divulgación científica foi creada no Xacobeo 2010 pola S.A. Xacobeo para divulgar os coñecementos sobre o Camiño de Santiago e as peregrinacións. 'Ad Limina' conta cunha versión impresa e outra dixital que lle permite unha ampla difusión e o recoñecemento internacional da alta calidade dos traballos que publicou ao longo destes 14 números.

Desde a súa creación, está vinculada ao Comité de Expertos do Camiño de Santiago, que ten a Paolo Caucci como o seu presidente de honra. O mesmo participou no acto de presentación esta mañá xunto ao responsable da S.A. Xacobeo, Ildefonso de la Campa, o presidente da cultura xacobea, Francisco Singul, e o presidente da Asociación Galega de Amigos do Camiño, Ángel Trabada.