A Dirección Xeral de Saúde Pública mantén activas diversas campañas de vacinación fronte á gripe e a Covid-19, con diferentes grupos diana como destinatarios.

Así, e do mesmo xeito que durante o pasado fin de semana, co ánimo de facilitar o acompañamento dos pais e nais á vacinación fronte á gripe dos seus fillos (con idades entre os 6 e os 59 meses), Sanidade citou aos nenos e nenas deste tramo de idade, para que durante as xornadas do sábado e domingo, acudan aos hospitais da Coruña, Vigo, Santiago, Ourense, Verín e O Barco de Valdeorras.

Previamente, o departamento sanitario da Xunta enviou SMS aos proxenitores dos menores con estas idades, informando sobre a súa cita para vacinarse da gripe, xa que se recomenda de forma sistemática nesta idade.

Ademais, lembrou que a vacinación fronte á gripe para estas idades continúa aberta de luns a venres en todas as áreas sanitarias. No entanto, no caso de querer vacinarse durante a semana, deberase solicitar cita, ben sexa nos centros de saúde, ou ben a través da aplicación SergasMóbil. Do mesmo xeito, a convocatoria de vacinación dos maiores de 80 anos, que comezou o pasado 16 de outubro, realízase nos centros de saúde de cabeceira, de luns a venres.

Con todo, para este domingo, a Consellería de Sanidade organizou unha convocatoria especial para aquelas persoas que, con 80 ou máis anos, aínda non recibisen as vacinas da gripe e da Covid-19. Neste sentido, explicou que poderán acudir aos grandes recintos de cada área sanitaria.

AUTOCITA GRUPOS CON PATOLOXÍAS DE RISCO

Ademais, desde o pasado 16 de novembro Sanidade mantén habilitado o sistema de autocita para as persoas con 12 ou máis anos e que estean inseridas nos grupos con patoloxías de risco, mulleres durante o embarazo e puerperio, persoal de servizos esenciais, convivientes de persoas de risco etc. Así, este grupo poboacional poderá acudir a vacinarse, previa autocita, aos grandes recintos de vacinación.

Así mesmo, no caso das persoas con condicións de risco, e idades comprendidas entre os 6 meses e os 11 anos, desde o pasado 18 de novembro tamén poderán facer uso da autocita para vacinarse, aínda que neste caso, a vacinación será nos hospitais da rede sanitaria pública galega.

ENSAIO 'GALFLU'

Por outra banda, este domingo finalizará o ensaio clínico para avaliar a eficacia da vacina da gripe de alta carga en poboación entre 65 e 79 anos, no que xa participaron máis de 59.300 galegos e galegas.

Con este estudo pioneiro, preténdese valorar se a vacina de alta dose é máis efectiva que a vacina de dose estándar á hora de reducir os casos de gripe, hospitalizacións e complicacións asociadas nas persoas de 65 a 79 anos, nas que de maneira rutineira administraríase a vacina fronte á gripe de dose estándar.