A Fundación Galega contra o Narcotráfico manifesta o seu estupor e a máxima preocupación ante os posibles permisos penais ao narcotraficante Sito Miñanco, aínda que expresa o seu "respecto" ás autoridades. "Estamos ante un narcotraficante convicto, que presenta un elevado risco de fuga, alta capacidade económica e posibilidade manifesta de reincidencia", indica a fundación, que lembra que "ten pendente un xuízo polo que lle van a pedir 29 anos de cárcere, presupónselle diñeiro, contactos e motivos máis que suficientes para poder fuxirse e un elevadísimo risco de reincidencia".

No mesmo comunicado, a fundación advirte de que "fuxiu outras veces e a última vez que foi detido estaba aínda en terceiro grao aproveitando beneficios penais para traficar". "Que máis fai falta para mantelo en prisión?", pregúntase. "Se queremos gañar a batalla ao narcotráfico o último que debemos facer é outorgar este tipo de incomprensibles permisos penais a grandes traficantes. Convén lembrar que Miñanco está considerado como un dos grandes capos da cocaína de todos os tempos en España e líder dunha banda internacional de traficantes de manifesto perigo", sentenciou, ante o que pide "evitar concesión permisos ou reforzar ao máximo a vixilancia para evitar que volva fuxirse".

REVISAR A LEXISLACIÓN

Con todo, a fundación non obvia que a concesión desta serie de permisos obedece a dereito, por iso hai unha terceira decisión a tomar "de maneira urxente e inaprazable: revisar de forma rigorosa os criterios para outorgar permisos penais aos grandes capos da droga evitando que estas perigosas situacións volvan producirse". Para esta entidade, "resulta imprescindible abordar unha reforma legal que achegue solucións a este grave problema de seguridade".