A Facultade de Medicina de Santiago de Compostela acolleu este venres a presentación da Asociación Galega de Covid Persistente (Asgacop), que nace co reto de visibilizar a enfermidade e unificar a atención dos pacientes.

"Nacemos co obxectivo de que a atención a todas as persoas que teñen covid persistente sexa homoxénea, independentemente da área sanitaria na que viven e do profesional que as trate. Constatamos que neste momento a atención das persoas depende de quen as leve e onde vivan, cando somos persoas que coa cantidade de síntomas que temos non podemos estar a peregrinar dunha área a outra e dun servizo a outro para ter unha boa atención", demandou a presidenta da asociación, Isabel Quintana.

En declaracións aos medios antes do inicio dunha mesa redonda na que abordaron as distintas perspectivas desta enfermidade, Quintana resumiu tamén outro dos obxectivos: visibilizar a enfermidade. Neste sentido, explicou que ao ser "persoas aparentemente sas", é "moi difícil" xustificar a enfermidade, polo que demandou "recoñecemento" e que se lles poña "a etiqueta". "Soa mal, pero todo o que non ten un número en sanidade non existe", manifestou.

Ademais, Quintana lamentou que ao non ter ese recoñecemento, non é posible calcular a cantidade de xente que ten covid persistente. Con todo, estimou que un 3,8% da poboación pode sufrir esta enfermidade. "En Galicia falariamos de máis de 70.000 persoas", indicou.

"CAMBIOUME A VIDA"

"A min cambioume a vida totalmente", explicou Estefanía Fernández, paciente de covid persistente, veciña de Lugo, e unha das participantes no acto de presentación deste venres. "Ao principio sentinme mal, pero despois collín o alta, volvín traballar e vin que no canto de ir a mellor ía a peor. Cada día atopábame máis cansa, custábame máis pensar e tiña unha fatiga que non era normal. Cambioume totalmente a forma de vivir", sostivo.

No seu caso, médica de profesión, tres anos despois de pasar o Covid, non puido volver exercer e, aínda que mellorou e pode realizar actividades cotiás "máis sinxelas", non é capaz de facer outras accións, como facer deporte, actividade que practicaba con asiduidade, incluso correndo medias maratóns, antes de padecer covid.

Outra das cuestións nas que lle cambiou a vida a Estefanía foi na lectura, posto que a memoria tamén se viu afectada e "non lembraba nada do día anterior". A ela salvárona os audio libros, recomendou.

ASOCIACIÓN

A Asociación Galega de Covid Persistente nace con 44 socios, a gran maioría mulleres de Ourense, Lugo, A Coruña e Vigo, principalmente. E é que, segundo destaca Asgacop, a enfermidade afecta nun 80% a mulleres de mediana idade, moi activas laboral e socialmente, previamente sas e que pasaron a Covid-19 de forma leve ou moderada.