A ministra de Educación, Formación Profesional e Deportes, Pilar Alegría, insistiu en que "a Constitución e o resto do ordenamento xurídico" impide implantar a Avaliación do Bacharelato para o Acceso á Universidade (ABAU) común proposta polo presidente do Partido Popular, Alberto Núñez Feijóo.

Na súa intervención, Alegría defendeu que Feijóo "non quere exercer unha oposición responsable: "Estamos a velo ocorrencia tras ocorrencia. Deixen de marearnos con ocorrencias que non nos levan a ningún lado".

"O PP leva reclamando a ABAU única desde que reinaba Carolo pero chegaron ao Goberno de España, gobernan con maioría absoluta e non a aproba, saben por que? porque a Constitución, o ordenamento xurídico e as competencias das comunidades autónomas non llo permiten", sentenciou.

No entanto, a ministra puntualizou que o PP esta vez tivo "un golpe de orixinalidade" ao cambiar a ABAU única para toda España por unha ABAU única "soamente para as comunidades autónomas do Partido Popular". "Bravo, aquí están os adaíles da igualdade", remarcou.

"O ilegal non é unha ABAU común, ilegal é incumprir as sentenzas que garanten o ensino en castelán en Cataluña. Ilegal é roubar diñeiro público para subvertir a orde constitucional. Iso é ilegal", respondeu a deputada do PP Esther Muñoz durante a súa intervención este mércores na sesión de control ao Goberno no Congreso dos Deputados.