Era Rueda ou Feijóo, era Besteiro ou Pedro Sánchez, era Pontón ou Néstor Rego, era Marta Lois ou Yolanda Díaz?. Non pasaron nin 24 horas dos comicios galegos e a vitoria incontestable do PPdeG e do actual presidente da Xunta, Alfonso Rueda, xa non é del, senón do seu mentor, Alberto Núñez Feijóo.

Unha mensaxe que, curiosamente, vén desde o seu propio partido, e dos seus dirixentes estatais que consideran que o gran vencedor destes comicios é o PP de Núñez Feijóo e, si, claro, tamén o de Alfonso Rueda, pero en menor medida. E todos apuntan ao PSOE de Pedro Sánchez, non o de Gómez Besteiro, como o gran derrotado do 18F.

Unha lectura en clave madrileña que tamén xogan os principais medios de comunicación que vían nos comicios galegos un plebiscito entre Sánchez e Feijóo no que o espazo galego era secundario e no que o máis importante eran as mensaxes que chegaban desde Madrid. Por iso, a gran alegría que hoxe respiran os líderes estatais do PP, que din que os resultados de Galicia enmendan de plano a política de Sánchez de negociar cos independentistas cataláns. 

Esta caída dos socialistas prodúcese en plenas negociacións con Junts para sacar adiante a lei de amnistía que beneficie aos implicados no procès. O PSOE contaba con chegar ás eleccións galegas co transo da amnistía xa superado, pero o voto en contra de Junts no pleno do Congreso dos Deputados atrasou a aprobación da norma e meteu de cheo a amnistía na campaña galega.

"SECUESTRO INDEPENDENTISTA" EN GALICIA

"Feijóo, 40 y Sánchez, 9", apuntaba este luns a presidenta de Madrid, Isabel Díaz Ayuso ao asegurar que o PP de Feijóo tamén evita en Galicia un "novo secuestro do independentismo" do BNG. Tamén o presidente de Valencia, na mesma liña, destacaba que o PP evitou o 18F un novo "procés" en Galicia. Mensaxes, obviamente, en clave española que o propio presidente galego asumiu na noite electoral ao asegurar que Galicia "non quere chantaxes", en alusión ás negociacións con Puigdemont.

En Ferraz con todo, restan importancia ao impacto da amnistía no resultado electoral e din, agora, que os galegos votaron en clave galega. O PSOE sabía que estas eleccións eran clave para Feijóo, que se xogaba boa parte do seu crédito como líder do PP nun territorio no que el mesmo arrasou na última década, con catro maiorías absolutas seguidas como líder 'popular' en Galicia.

O PSOE tiña claro que perder este bastión podería ter consecuencias a nivel estatal e pór en cuestión o liderado de Feijóo e, desde o principio, mostráronse dispostos a dar o seu apoio ao BNG, se os números daban, para desaloxar ao PP da Xunta. De feito, fontes do PSdeG aseguran que a estratexia de Ferraz non foi a máis acertada, nin nas mensaxes nin na utilización da enquisa do CIS que xogaron a polarizar o voto entre o nacionalismo e o PP. 

Os resultados demostran que os votantes da dereita mobilizáronse máis despois de que algunhas sondaxes apuntasen á posibilidade de quedar por baixo da maioría absoluta. Un candidato sen rodaxe e unha polarización total da campaña fixo que o PSdeG sufrira o seu peor resultado histórico nunhas eleccións galegas.

A LECTURA ESTATAL "UN ERRO"

O BNG tamén está incómodo con esta mensaxe que agora se traslada de Feijóo gañador e Sánchez perdedor e insiste en que os malos resultados do PSdeG non teñen nada que ver coa cesión da lei de amnistía aos partidos independentistas cataláns, argumentando que facer unha lectura "estatal" do resultado dos comicios é un "erro".

"Eu creo que facer unha lectura estatal destas eleccións é un erro. Sei que é algo que pasa en moitas ocasións, cada un quere afianzarse. Pero é evidente que os galegos e as galegas non votaron pensando na amnistía", apuntou Pontón que tamén tenta monopolizar os anceios de cambio en Galicia, a pesar de que non lle chegaron para acceder á Xunta.

Por iso, comprometeuse a seguir traballando para "ensanchar máis" e chegar a máis sectores da poboación co mesmo obxectivo co que se presentaron ás urnas e a seguridade de que o BNG se consolidou como forza "alternativa" ao PP e será a que "rompa a hexemonía" dos populares.

SUMAR

Tamén sae moi tocado o socio de coalición do PSOE, Sumar, liderado pola vicepresidenta segunda, Yolanda Díaz, que obtivo un resultado moi malo ao quedar moi lonxe de obter representación por Pontevedra ou A Coruña como era o seu obxectivo. Un fracaso que tamén aproveitan desde o PP para apuntar que o Goberno de españa sae "moi tocado, senón afundido" destes comicios. Unha intepretación moi diferente a que fan no PSOE que cren que os comicios vascos suporán un novo balón de osíxeno para a súa estratexia en Madrid.