O Tribunal Superior de Xustiza de Galicia (TSXG) recoñeceu a un técnico en coidados de enfermaría o dereito ao cobro da baixa por covid-19 como accidente laboral desde o primeiro día e non, como pretendía a mutua, desde só tres meses antes desde que se solicitou a determinación da continxencia.

A sentenza do alto tribunal galego, con data de 21 de febreiro, confirma outro fallo previo do Xulgado do Social número 3 de Lugo contra o cal a mutua presentou un recurso por entender que a empregada só podía percibir a incapacidade temporal (IT) cunha retroactividade de tres meses desde a solicitude para que esta pasase de ser por enfermidade común a accidente de traballo.

O técnico en coidados de enfermaría estivo de baixa desde o 30 de outubro de 2020, cando deu positivo en covid-19, e non foi ata o 26 de marzo de 2021 cando se presentou a solicitude de determinación a continxencia, que o tribunal médico resolveu en outubro de 2021. Por tanto, a mutua pretendía que só puidese cobrar como accidente laboral desde o 26 de decembro de 2020, dous meses despois da IT.

En primeira instancia, a aseguradora argumentaba que o centro onde traballaba non constaba inscrito como sociosanitario, pero o Xulgado do Social resolveu que era claramente sociosanitario aínda que non estivese rexistrado como tal. Tamén determinara o xuíz que o importante era a data da IT, sen ese prazo de tres meses. Agora, tras o recurso, o TSXG resolve no mesmo sentido de que o cobro debe "retrotraerse á data do feito causante", é dicir, á propia baixa, concedida xa o 30 de outubro.

O Sindicato de Técnicos Auxiliares de Enfermaría (SAE) reivindica esta sentenza que, esperan, "creará xurisprudencia en toda España". Neste contexto, a secretaria de comunicación de SAE en Galicia, Trinidad Marín García, lembra que están "pendentes" de que o Servizo Galego de Saúde (Sergas) abone a recarga de prestacións da Seguridade Social derivadas de accidente laboral por covid-19 "a todos aqueles profesionais a quen se lles recoñeceu esta indemnización".