O corpo sen vida dun home de mediana idade foi localizado sobre as 14.00 horas deste mércores no peirao de Curuxeiras, en Ferrol. A alerta foi dada aos servizos de emerxencia por un home que observou na auga un corpo flotando no lugar onde adoita atracar a lancha que realiza as viaxes entre esta cidade e Mugardos.

Na zona persoáronse axentes da Policía Local de Ferrol, Policía Nacional, Garda Civil e Autoridade Portuaria de Ferrol-San Cibrao, así como Salvamento Marítimo e efectivos de Gardacostas de Galicia. Precisamente, a embarcación Sebastián de Ocampo de Gardacostas foi a encargada de rescatar o corpo e levalo a terra.

Ao momento tamén acudiron profesionais de Urxencias Sanitarias de Galicia-061. Unha comisión xudicial desprazouse ao porto para autorizar o levantamento do cadáver, que aínda está sen identificar. Así, foi trasladado ao Hospital Naval de Ferrol, onde se lle realizará a autopsia na tarde deste mércores.