A Garda Civil investiga a un menor de 14 anos por unha suposta agresión sexual cometida contra unha nena na localidade de San Cibrao, no municipio lugués de Cervo. Fontes próximas ao caso trasladaron a Europa Press que os feitos ocorreron na tarde do pasado mércores. Tamén está investigado outro menor de idade pola súa posible implicación no ocorrido.

Ao redor das 17,30 horas, unha persoa chamou á central do 112 para pedir axuda por unha agresión sexual que estaba a ocorrer nunha vivenda de San Cibrao. Desde o teléfono de emerxencias trasladouse o aviso ás forzas da orde e a Urxencias Sanitarias 061, que acudiron ao lugar para atender á vítima, trasladada máis tarde a un centro hospitalario para ser sometida a unha exploración médica.

As dilixencias do caso formuladas pola Garda Civil foron trasladadas á Fiscalía de Menores.