O home ferido no accidente de Ames en que perderon a vida un pai e a súa filla foi dado de alta. Pola súa banda, a muller continúa hospitalizada en estado moi grave, segundo confirmaron a Europa Press fontes sanitarias. O Concello de Santiago convocou un minuto de silencio este martes, ás 12.00 horas na Praza do Obradoiro, polas dúas vítimas, pai e filla, veciñas da parroquia compostelá de Laraño, que faleceron este domingo no accidente de tráfico de Ames.

Precisamente, tanto a través de redes sociais como na rolda de prensa que protagonizou este luns, a alcaldesa de Santiago, Goretti Sanmartín, enviou as súas condolencias e toda "a forza do mundo nestes durísimos momentos" para a familia e amizades de Aira M. F., de 17 anos, e Óscar M. P., de 44. Tanto Sanmartín, como o alcalde de Ames, Blas García, desprazáronse na tarde do domingo ata o punto do sinistro tras coñecer o tráfico suceso.

No accidente, outras dúas persoas resultaron feridas, ás cales a alcaldesa compostelá, a través da rede social X, tamén desexa que "evolucionen ben e recupérense pronto", unha delas foi dada de alta e a outra segue moi grave. "Un día tráxico para Compostela", lamenta nesta mensaxe en redes sociais, emitido na noite do domingo.

ACCIDENTE

O accidente produciuse na estrada AC-543 (Santiago-Noia), á altura da urbanización de Aldea Nova. As dúas vítimas mortais, pai e filla, viaxaban nun Opel Corsa, en dirección Bertamiráns cando chocou frontalmente contra un Volkswagen T-Roc, que circulaba polo carril dirección cara a Santiago.

Dous ocupantes deste segundo vehículo, un home de 46 anos de idade e iniciais F.C.G., e unha muller de 44 anos e iniciais N.P.F. resultaron feridos, nunha primeira avaliación, de gravidade, polo que foron evacuados ao Hospital Clínico Universitario de Santiagoa. Os Bombeiros tiveron que excarcerar e liberar a estas dúas persoas.

O 112 tivo coñecemento do suceso ás 17.45 horas e ata o lugar, á parte de tres ambulancias do Servizo de Urxencias Sanitarias de Galicia-061 e os Bombeiros de Boiro e de Santiago, tamén foron desprazados o GES de Brión, a Garda Civil, a Policía Local e Protección Civil de Ames.

A Garda Civil de Tráfico ratificará as circunstancias do suceso, coma se a menor falecida levaba o cinto de seguridade e se un elemento voluminoso que transportaban na parte de atrás do habitáculo ía sen asegurar. O punto do sinistro, entre a rotonda de Aldea Nova e a gasolineira Galp, é unha zona con visibilidade, pero unha pendente de baixada.