O Colexio Médico de Ourense fixo público un comunicado no que traslada o seu apoio aos profesionais que levan meses mobilizándose pola situación "insustentable" da área sanitaria, "nunha deriva permanentemente negativa que parece non ter fin" e que levou a varios servizos a estar "ao bordo do colapso".

No seu comunicado, o colectivo médico sinalou que moitos dos problemas da área sanitaria de Ourense son compartidos con outras áreas galegas e mesmo co resto de España, pero advertiron de que na área ourensá hai "problemas específicos" que afectan de forma grave a servizos como Urxencias ou Oftalmoloxía.

"A pesar de expolo en varias ocasións en reunións coa Xerencia, o equipo directivo non foi capaz de afrontar un plan sólido, consistente e excepcional para solucionar as carencias e disfuncións crónicas que sofre desde hai anos a nosa área sanitaria, polo que estas se foron agravando día tras día", denunciaron desde o Colexio Médico.

O colectivo de facultativos advertiu de que "non é de recibo apelar a un maior esforzo dos médicos", que xa levan facéndoo "desde hai demasiado tempo", e denunciaron que as medidas "superficiais e meramente conxunturais" crean "máis malestar e agravios comparativos entre os profesionais".

Respecto diso, sinalaron que é o momento de "abordar os problemas estruturais" que levaron a esta "situación de excepción" e de cambiar o tipo de xestión, "saíndo da rixidez administrativa habitual e tomando as decisións necesarias" para reverter este escenario.