Os delegados de prevención do comité de empresa de Alcoa San Cibrao realizaron unha denuncia a Inspección de Traballo pola "falta de persoal" nas instalacións luguesas da compañía e polo "total desprezo" da firma cara aos empregados, ao negarlles equipos de protección individual (EPI).

No seu escrito, os traballadores da multinacional do aluminio apuntaron á "falta de persoal" para poder operar nas instalacións "con seguridade". "Nalgúns departamentos trabállase por baixo do persoal mínimo asinado en folgas", critican. Así mesmo, lamentan que na planta de Aluminio están a denegarse os EPI de protección respiratoria, con máscara con filtros activos como viña dando "historicamente" aos traballadores.

"Isto supón unha discriminación cara aos operarios, dado que si se lle proporciona á xefatura e aos técnicos canadenses que viñeron para o rearranque das cubas. Con todo, as que se fornecen agora aos cubistas que operan durante oito horas son máscaras FFP2, o que supón para os delegados de prevención un total desprezo para os traballadores de San Cibrao", engade o comité na súa denuncia a Inspección.

Ademais, subliñaron o "mal estado" do material co que teñen que traballar e as "posturas forzadas" dentro das cubas pola decisión tomada pola planta de non adecuar as zonas de traballo, "negándose a sacar as superestructuras con antelación".

Por isto todo, presentaron unha denuncia a Inspección de Traballo, co obxectivo de mellorar as condicións dos empregados. Todo iso ocorre menos dun mes despois de que a fábrica de Alcoa en San Cibrao, municipio lugués de Cervo, volvese producir aluminio primario tras dous anos de parón, comezando así un proceso de rearranque de forma gradual das súas cubas.