O conselleiro do Medio Rural en funcións, José González, visitou a nova cociña comunitaria da aldea modelo de Muimenta, situada no concello ourensán de Carballeda de Avia e que enxalzou como "un exemplo das pancas dinamizadoras que ofrece a Lei de recuperación para potenciar o territorio a través de actividades agrogandeiras e a modernización de núcleos rurais".

Segundo trasladou a Xunta a través dun comunicado, na visita tamén participou o director da Fundación RIA, Manuel Rodríguez, xunto a alumnos e profesores do quinto curso do grao de Estudos de Arquitectura da Universidade de Navarra que realizaron os seus traballos de fin de grao, expostos na Casa do Concello, en colaboración coa fundación, no marco do plan de dinamización desta aldea modelo ourensá.

O proxecto da cociña comunitaria foi financiado con 150.000 euros procedentes da liña de axudas do Goberno galego para a creación, mellora e ampliación de servizos básicos locais en aldeas modelo e polígonos agroforestais. Unhas axudas cun orzamento de tres millóns de euros que aínda poden solicitarse na convocatoria de 2024 ata o próximo 21 de marzo.

Esta iniciativa rehabilitou unha propiedade adquirida polo concello, que conta cun espazo de cociña equipada profesionalmente, comedor, baño e patio exterior. Pode ser usada no ámbito formativo e laboral, sendo apoio do primeiro Espazo Agrario de Experimentación que entrará en funcionamento este 2024, e tamén de forma recreativa ou asistencial polos veciños da zona.

A cociña comunitaria de Muimenta busca dar apoio ás actividades produtivas agrícolas da aldea modelo, permitindo o procesado das producións locais para empaquetar, conxelar ou elaborar produtos, ben polos veciños ou como iniciativa empresarial. Tamén servirá para apoiar ao concello no referido á asistencia no domicilio. Ademais, González insistiu na "capacidade tractora" dos plans de dinamización das aldeas modelo como a de Muimenta, Osmo no concello de Cenlle, O Penedo no de Boborás e Trascastro no de Incio.

Estes plans, afirmou o conselleiro, serán unha "referencia sólida" para confeccionar un modelo xeral de rexeneración dos núcleos rurais a través do impulso da actividade económica, a rehabilitación integral das aldeas seguindo criterios de arquitectura tradicional, a planificación preventiva reducindo o risco de incendios forestais, e a aposta polas 'aldeas intelixentes', con garantía de conectividade dixital e autosuficiencia enerxética.