Unha muller resultou ferida tras unha colisión frontal entre dous vehículos na PO-841, no quilómetro 15, ao seu paso polo municipio pontevedrés da Estrada. Segundo informou o 112, foron varios particulares os que minutos despois das 17.00 horas deron a voz de alarma e detallaron que era posible que algunha persoa non fose capaz de abandonar o seu vehículo.

Desta forma, a central de emerxencias deu aviso a Urxencias Sanitarias de Galicia-061, ao Servizo de Emerxencias da Estrada, á Garda Civil de Tráfico, á Policía Local e aos servizos de mantemento da vía. Unha vez no punto, os equipos de intervención confirmaron que todas as persoas estaban fóra dos vehículos e que unha delas necesitaba asistencia sanitaria. O tráfico tivo que ser desviado, para garantir unhas condicións seguras de circulación, tras os danos materiais provocados polo accidente, entre eles unha vertedura de aceite.