Máis dun terzo dos electores indecisos que acudiron ás urnas o pasado 18 de febreiro dubidaron entre escoller a papeleta do BNG, que se situou como segunda forza política, e o PSdeG, que obtivo o peor resultado histórico. Ademais, desa bolsa do 40 % de galegos que declararon que acudiron a votar e que non tiñan decidido o seu sufraxio antes do inicio da campaña, o 8,4 % manifestou que tivo dúbidas entre votar ao PPdeG, que logrou a súa quinta maioría absoluta consecutiva, e o BNG.

Así se desprende do estudo postelectoral de Galicia sobre as eleccións autonómicas de 2024, publicado este mércores polo Centro de Investigacións Sociolóxicas (CIS), no que se recolle que seis de cada dez galegos (o 60,8 %) tiñan decidido votar e por un partido ou coalición en concreto.

A enquisa postelectoral de Galicia contou con 4.077 entrevistas de 294 municipios das catro provincias e realizouse entre o 6 e o 9 de marzo deste ano. Das persoas que decidiron non ir votar o 18 de febreiro, o 14,55 tomou esa decisión porque está "farto" da política e de eleccións e o 23,2 % por que considera que "dá o mesmo". Pola súa banda, o 30,2 % di que non se sentía representado por ningún partido.

Deste mesmo estudo despréndese que o 11,9% dos indecisos manifestaron dúbidas entre o BNG e Sumar Galicia, e que o 5,1% dos galegos que non o tiñan claro, escolleron entre PP e Vox. Ademais, o 4,9% dos galegos estiveron a pensar entre apoiar ao PSOE ou a Sumar; mentres que o 1,4% escolleu entre PP e Democracia Ourensá.

Das persoas que decidiron ausentarse das urnas o 18 de febreiro, o 14,55% tomou esa decisión porque está "farto" da política e de eleccións e o 23,2% porque considera que "dá o mesmo" ir que non. Pola súa banda, o 30,2% di que non se sentía representado por ningún partido.

CAMBIARON O SEU VOTO

Segundo o estudo difundido este mércores, o 9 % dos galegos que acudiron ás urnas cambiaron o seu voto durante a campaña electoral e, deles, o 88 % só o fixeron unha vez, fronte ao 5,9 % que cambiaron ata en dúas ocasións a súa decisión. Isto é, o 7,9 % das persoas entrevistadas cambiaron o seu voto nunha ocasión durante o tempo de propaganda electoral.

Os votantes do PPdeG son os que maioritariamente tiñan decidido emitir un sufraxio e tiñan decidido facelo a favor deste partido. Así, o CIS recolle que o 85,5% dixo que ía votar, o 11,5% tivo dúbidas dalgún tipo e o 1,2% non ía ir a acudir ás urnas (pero fíxoo finalmente). Se se acouta ao tempo de campaña electoral, o 95,1% dos votantes do PP non variou a súa opción política depositada nas urnas.

En canto aos votantes do BNG, os galegos que prevían apostar por este partido e fixérono foron o 71,9% (o 86,8% iniciada a campaña), porcentaxe máis alta no caso de entre os que optaron polo PSOE nas urnas, ao alcanzar o 77,9% (94,3% en campaña). No caso de Democracia Ourensá, ante a tesitura de ir votar, tiña decidido esta opción o 72,2% (75,5% xa non cambiou de opinión en campaña), mentres que o 21,4% dos seus votantes dubidaron entre apostar por DO ou outro partido.

As dúbidas iniciais dos votantes ao BNG alcanzaron ao 27,1% de quen finalmente apoiaron esta opción e no caso de quen votaron ao PSdeG, presentáronse ao principio no 20,8%.

Do 11,5% de votantes da formación que lidera Alfonso Rueda que manifestaron que tiveron dúbidas, o 25,1% aseguraron na súa resposta que se debateron entre a papeleta do PP e do BNG; mentres que o 16,9% de quen optaron pola papeleta popular pero presentaron dúbidas fixérono entre PP e Vox.

No caso do BNG, as persoas que declararon dúbidas sobre esta opción debatéronse entre apoiar ao Bloque ou ao PSOE de José Ramón Gómez Besteiro (46,6%) ou dubidaron entre a formación de Ana Pontón ou Sumar (21%).

Á pregunta de cal cre que foi o tema máis debatido durante a campaña electoral, a Lei de amnistía (11 %) sitúase como primeira cuestión, seguido de sanidade (8,4 %), medio ambiente-pélets (6,8 %), as disputas entre partidos (4,8 %) e como quinto asunto, a crise económica e subida de prezos (3 %). Dos entrevistados, o 40,6 % di que se informou da campaña pola televisión e o 19,6 % a través da prensa dixital. Por parte da prensa escrita, o 8,4 % declara facelo, pero son máis a través da radio (9,8 %) e redes sociais (12,2 %).

Outra das preguntas que fai a enquisa do CIS é se durante a campaña os entrevistados acudiron a algún almorzo, xantar ou cea dalgún partido ou coalición, ao que responden afirmativamente o 2,2 %. Deles, o 67,5 % acudiron a unha comida ou evento deste tipo do PP, o 15 % a un do BNG e un 13,1 %, do PSOE.

A enquisa do CIS tamén pregunta polo sentimento de pertenza. Unicamente español sitúase o 4,1 % dos enquisados, mentres que máis español que galego se declara o 2,9 %. O 68 % síntese tan español como galego e o 1 % máis galego que español, fronte ao 5,9 % que se percibe unicamente galego.