Un menor resultou ferido este venres nun incendio na vivenda da súa familia no municipio coruñés da Laracha. O menor foi trasladado ao centro de saúde con lesións na cara.

Segundo informou o 112, pasadas as 8,00 horas, o servizo recibiu a chamada dunha muller que pedía axuda urxente por un incendio na súa vivenda. O domicilio atópase no lugar de Campo da Ran, en Erboedo, na Laracha, onde se dirixiron os equipos de emerxencia despois de recibir os avisos dos xestores do 112 Galicia.

Así, acudiron os Bombeiros de Carballo, os axentes da Garda Civil e os voluntarios de Protección Civil da localidade. Tamén os profesionais de Urxencias Sanitarias de Galicia-061, aínda que o menor ferido foi evacuado pola súa propia familia ao centro de saúde da localidade.

Presentaba queimaduras na cara debido ao lume que se formou nun cuarto do primeiro piso da vivenda, que, quedou danado tanto polo incendio como polo intenso fume producido. De feito, os bombeiros finalizaron recentemente coa ventilación das distintas estancias e coas medicións de gases correspondentes co fin de garantir as mellores condicións de habitabilidade para a familia. Polo momento, descoñécese a orixe deste incendio, aínda que os afectados aseguran que comezou nun secador de pelo que prendeu nun colchón.

UN CUARTO CALCINADO EN CARBALLO

Por outra banda, no municipio tamén coruñés de Carballo ardeu outra habitación no interior dunha vivenda situada na Rúa de Anllóns. Ocorreu ao redor das 20,00 horas deste xoves. Houbo unha persoa ferida, aínda que se descartou o seu traslado ao centro hospitalario, xa que foi suficiente cos coidados proporcioandos polo equipo de Urxencias Sanitarias de Galicia-061 no mesmo lugar do suceso.

O incendio tamén se iniciou nun colchón e acabou provocando danos en toda a habitación.