A CIG incidiu en que "o camiño" para que a multinacional Alcoa "cumpra" os seus compromisos coa planta de San Cibrao --en Cervo (Lugo)-- pasa pola mobilización dos traballadores e que os gobernos en Galicia e o Estado "interveñan de forma activa".

Este luns, delegados da CIG en Alcoa e os seus auxiliares participaron nunha asemblea á que tamén asistiu o secretario xeral da central nacionalista, Paulo Carril, quen apelou a "seguir o mesmo camiño que hai ano tres anos" para que a compañía con sede en Pittsburg "cumpra co acordo".

Neste sentido e tras apelar á unidade do persoal da planta e os seus auxiliares, subliñou que este traballo debe estar acompañado pola "intervención de forma activa" das administracións, que, ao seu xuízo, foron "incapaces" ata o momento "de dar resposta ás ameazas de Alcoa".

Así as cousas, a CIG reiterou as súas demandas para blindar o futuro da factoría de San Cibrao de crear unha figura de empresas "hiper-electrointensivas" e "garantir" a través do estatuto electrointensivo "a máxima compensación por CO2 permitida por Europa" para que quede desligada do PGE.

Así mesmo, tamén reclaman unha poxa de interrumpibilidade que sirva de "colchón" nos picos de consumo de enerxía, executar a "alegación" acordada no CES de Galicia para que exista unha bonificación directa na factura eléctrica do 30% para as actividades industriais e económicas ou modificar a factura eléctrica para "liberar das peaxes e cargos asociados ao transporte pola proximidade dos centros de consumo aos centros de produción".