O Concello de Ribadeo decidiu pechar a Praia das Catedrais este Xoves Santo para evitar o risco de desprendementos ante o forte temporal de vento e mar que azouta Galicia.

Segundo explicou o propio alcalde, Daniel Veiga, a decisión de pechar o areal ás visitas é unha medida de "precaución" ante o "forte" temporal que se está deixando sentir na costa do municipio.

"Este temporal é forte e preferimos previr co fin de evitar posibles incidencias ou accidentes. Pedimos desculpas polas molestias que se poidan ocasionar ás persoas que nos visiten hoxe, pero no Concello velamos pola súa seguridade e neste momento non se dan as mellores condicións para visitar As Catedrais", afirmou.