As emisións industriais de gases invernadoiro baixaron un 23% en 2023 respecto ao ano anterior, segundo os datos oficiais recompilados polo Observatorio Galego da Acción Climática (Ogacli). A cantidade ascendeu, apuntan, a 4,6 millóns de toneladas, "a cifra máis baixa desde que entrou en vigor o comercio de emisións en 2005". As 40 industrias obrigadas a participar no RCDE representan un 30% das emisións totais de gases invernadoiro de Galicia. Pertencen a sectores industriais intensivos en emisións entre os que destaca o enerxético.

Así, as centrais térmicas de gas natural e carbón e a refinaría de petróleo foron responsables, conxuntamente, de case o 70% das emisións suxeitas en Galicia ao comercio de emisións durante 2023. Apuntan que o descenso das emisións industriais de gases causantes do cambio climático en 2023 concentrouse nas centrais térmicas (-22,1%), nas instalacións de combustión e nas centrais de cogeneración de diversos sectores industriais (-42,5%) e na produción de aluminio (-34,9%) e de de aceiro e ferroaleaciones (-39,7%).

Segundo explican, as razóns desta baixada apuntan máis a factores conxunturais que a avances na descarbonización como resultado de cambios estruturais. Así, a baixada da xeración eléctrica nas centrais térmicas polo aumento da produción hidroeléctrica tras un ano paradas, a parada temporal da planta de aluminio e a menor actividade da planta de alúmina en Alcoa San Cibrao, o descenso na produción de ferroaleacións e a caída na utilización nas centrais de cogeneración de fuel das madeireiras Finsa e Intasa e da conserveira Jealsa son as causas "principais" do recorte das emisións industriais durante o pasado ano.

Ademais, remarcan que o peche definitivo da central de carbón das Pontes en outubro foi o único progreso "destacado" na transición enerxética en Galicia durante o ano, "dado o reducido aumento da potencia renovable e a ausencia de plans para a redución progresiva da produción de derivados de petróleo na refinaría da Coruña ou para a substitución das centrais de coxeneración de fósiles".