A web da Xunta publica este venres a consulta previa para unha nova Lei de servizos dos medios públicos de comunicación audiovisual de Galicia para a sociedade dixital, que se adecue á normativa europea e á realidade que derivada dos cambios tecnolóxicos dos últimos anos. Nun comunicado, a Administración autonómica explica que con esta norma buscará adecuar a oferta da Corporación Radio e Televisión de Galicia (CRTVG) á diversificación dos formatos audiovisuais, nun contexto cunha audiencia fragmentada e globalizada pola que compiten non só os fornecedores tradicionais do servizo de comunicación audiovisual, senón tamén fornecedores globais.

Tamén trata de reforzar a misión e valores do servizo público que presta a CRTVG, entre eles o reto de situar adecuadamente a lingua galega no contexto dos novos formatos dixitais de información e entretemento.

A Xunta sinala que as modificacións introducidas pola Directiva comunitaria 2018/1808, polo Regulamento comunitario 2024/1083 e pola recente Lei 13/2022 xeneral de comunicación audiovisual, xunto cos avances tecnolóxicos, obrigan a reconsiderar o vixente texto legal para axustalo a esta normativa e ás novas demandas dos consumidores no ámbito audiovisual, que cambiaron moito nos últimos tempos.

En definitiva, a nova Lei de comunicación audiovisual tratará de adecuar a lexislación galega ás últimas modificacións normativas a nivel español e comunitario e situar a CRTVG para afrontar os retos aos que deben enfrontarse os medios públicos nun marco de competitividade de medios e servizos audiovisuais.