Correos recibiu un total de 36.446 solicitudes de voto por correo en Galicia para as eleccións europeas do próximo domingo 9 de xuño, segundo informou a empresa pública nun comunicado. Do total, 25.135 presentáronse de forma presencial na rede de oficinas postais e 11.311 de forma telemática a través da web de Correos, mediante firma electrónica e aceptándose como sistemas de identificación válidos os certificados de persoa física recoñecidos polo Ministro de Industria e o DNI electrónico (DNI-e).

Por provincias, a da Coruña é na que se rexistraron máis peticións de voto por correo, cun total de 9.651; seguida de Pontevedra, con 8.509. Pola súa banda, en Lugo producíronse 3.553 peticións e en Ourense 3.422. A Xunta Electoral Central (JEC) acordou ampliar o prazo de depósito do voto por correo ata o vindeiro venres día 7 de xuño, no horario habitual de apertura das oficinas de Correos e, como máximo, ata as 14 horas.

De acordo coas instrucións da Xunta Electoral Central, neste proceso electoral esíxese a entrega persoal polo elector nas oficinas de Correos da documentación necesaria para exercer o voto por correo. Para iso, ao depositar o voto por correo, deberá identificarse mediante a presentación do Documento Nacional de Identidade, pasaporte, permiso de conducir, cartón de residencia ou calquera outro documento válido que permita identificar ao elector, debendo o persoal de Correos proceder á súa comprobación.

As persoas que solicitaron o voto por correo pero non poidan acudir persoalmente á oficina de Correos para depositar o voto, deberán outorgar unha autorización para que a entrega sexa realizada por outra persoa no seu nome. A autorización deberá ser asinada polo elector e acompañarse da fotocopia do seu Documento Nacional de Identidade, pasaporte ou outro documento oficial identificativo, así como da fotocopia do documento identificativo da persoa á que autoriza.

Para facilitar a redacción dese documento de autorización con todos os datos necesarios, Correos recomenda utilizar o modelo de autorización que se pode descargar na web www.correos.es. O persoal de Correos non aceptará a entrega de documentación electoral pertencente a outro elector se non se acompaña da correspondente autorización asinada polo elector, que deberá ser conservada, xunto á fotocopia do documento oficial acreditativo do elector e de quen entrega no seu nome a documentación electoral, para a súa remisión á Xunta Electoral correspondente. Desde a empresa postal recoméndase aos cidadáns que desexen exercer o seu dereito ao voto por correo que procuren non esperar ata o último día e que aproveiten a amplitude horaria das oficinas postais.