A secretaria xeral do PPdeG, Paula Prado, e o candidato galego ás eleccións europeas Adrián Vázquez puxeron en valor a proposta do PP para que o comisario de agricultura sexa membro do Grupo Popular. Paula Prado e Adrián Vázquez visitaron este martes as instalacións da cooperativa agraria AIRA en Taboada acompañados polo coordinador de Medio Rural do PPdeG, Avelino Souto, así como polo deputado no Congreso Francisco Conde e o portavoz do PP local, Ramiro Moure. Unha visita na que os populares coñeceron o funcionamento da maior fábrica de pensos para vacún de leite que existe en España e abordaron xunto á directiva de AIRA os retos aos que se enfronta o sector no presente e futuro máis próximo.

No acto, do que informou o PPdeG nun comunicado, analizaron, entre outras cuestións, a necesidade de mellorar o funcionamento e a aplicación da Lei de cadea alimentaria para evitar que os produtores vendan por baixo dos seus custos. Así como a formulación dunha PAC que actualmente prima o criterio ideolóxico á conta do dos produtores. Desde o PPdeG comprometéronse a seguir defendendo a declaración do sector lácteo como estratéxico, reducir a burocracia e impulsar medidas para garantir a substitución xeracional nas explotacións.