O conselleiro do Mar, Alfonso Villares, inaugurou este venres a X edición das Xornadas Internacionais de Pesca sobre Grandes Migradores organizadas pola Organización de Palangreiros Guardeses (Orpagu) no concello pontevedrés da Guarda, onde puxo en valor a traxectoria desta entidade en favor da actividade pesqueira galega "sustentable e produtiva".

Segundo recolle a Xunta nun comunicado, Villares destacou que Orpagu leva case 30 anos contribuíndo ao desenvolvemento e ao fomento da pesca de palangre, fresca e conxelada, recoñecida desde 1997 como organización de produtores, alcanzando unha facturación de 36 millóns de euros.

El dixo que a entidade representa a maior frota de Europa no seu segmento, especializada na pesca de peixe espada e similares, ao agrupar 74 buques que operan en caladoiros de todo o mundo.